Shining Girls مسلسل مظلوم على Apple TV+
على الرغم من تميز منصة Apple TV+ والأعمال القوية اللي بتقدمها، لكن لسه عندنا إحساس أنها مظلومة في التغطية الإعلامية والصحفية في مصر، يمكن بسبب عدم انتشارها بشكل واسع، مقارنة بشبكات تانيه زي نتفليكس مثلا. لو كنتم مشتركين في Apple TV+ ننصحكم تبدأوا فوراً في متابعة مسلسل Shining Girls
Shining Girls هو مسلسل قصير، مكون من ٨ حلقات، مدة الحلقة الواحدة حوالي ساعة، من المشاهد الأولى له هاتحسوا انكم مش عاوزين تسيبوه بدون ما تشوفوا أخر لقطة في أخر حلقة. ومع نهاية الحلقة الأولى هاتحسوا انكم أصبحتم مدمنين تماما على المشاهدة، كل ده علشان تعرفوا النهاية هاتكون عامله ازاي.
Shining Girls بيحكي عن (كريبي) -قامت بالدور اليزابيث موس- واللي بتتعرض لاعتداء وحشي من مجرم غامض. وبعد مرور سنين طويلة ومحاولتها التعافي من التجربة القاسية اللي تعرضت لها، بتبدأ تكتشف أن نفس الجريمة تعرضت لها سيدات تانيين في فترات زمنية مُختلفة. فترات زمنية تبدأ من ١٩١٤ ولحد النهرده! وده كان أكبر لغز نقابله في المسلسل، أن الفاصل الزمني بين الجرائم غير منطقي بالمرة!
Shining Girls بيفكرنا بمسلسل تاني مشهور هو Dark واللي بلعب على نفس تيمة الغموض والجريمة مع خط السفر عبر الزمن. لكن نقدر نقول أن Shining Girlsهو نسخة (مُخففة) من Dark اللي قدر (يسحل) دماغ المشاهدين على مدار سنوات، وأصبح له مهووسين بيتناقشوا على السوشيال ميديا طول الوقت عن نظريات مُختلفة لتفسير الأحداث. Shining Girls حسسنا بنفس الشعور بالتوهان، لكن المميز فيه انه بيقدم إجابات سريعة نسبياً لأسئلتنا على أساس أنه مكون من ٨ حلقات فقط.
الابداع الحقيقي في Shining Girls كان في اخراج داينا رايد اللي أخرجت ٤ حلقات، ثم ميشيل ماكلارين اللي أخرجت حلقتين ثم إليزابيث موس بطلة المسلسل اللي أخرجت حلقتين. والحقيقة أننا لما نتفرج على المسلسل مش هانحس باختلاف المخرجين، لأن كان فيه خط واضح من البداية للنهاية بتتحرك عليه الأحداث، كل ده مع تحديات صعبة جدا في طريقة تغيير شكل الأبطال وقصات الشعر، وتغيير الديكور بما يتناسب مع الفترات الزمنية المختلفة، كل ده بدون خطأ أو نغمة نشاز واحدة نحس بيها في العمل. وده مجهود يحُسب لصناعه.
إليزابيث موس قدمت أداء ولا أروع، ومن خلال أدائها حسستنا أنها الموكل لها طرح كل الأسئلة اللي بتدور في دماغنا كمشاهدين، لأننا عارفين كويس أن دراما السفر عبر الزمن بتجيب معاها عدد ضخم من الأسئلة وأحيانا عدم الفهم والقدرة على المتابعة. في حالة كان تنفيذ العمل تم باستسهال أو بمشاكل في السيناريو.
العيب الوحيد في Shining Girls هو نهايته، ودي حاجه مش عاوزين نتكلم فيها كتير علشان ما نحرقش عليكم الأحداث، لكن حسينا أن المسلسل تم اغلاقه باستعجال، ومع ترك بعض الأسئلة غير مُجاب عنها بشكل واضح. ونعتقد أن صناع المسلسل حابين يفتحوا الباب على انتاج موسم ثاني منه، في محاولة منهم لتقليد مسلسل Dark اللي استمر على مدار مواسم متعددة.
مسلسل Shining Girls عمل قوي، على منصة مظلومة في مصر، يستحق المشاهدة، لكنه مش من نوعية المسلسلات اللي ممكن تتابعوها بنصف تركيز، كمان بنحذر أي حد مر بتجربة اعتداء أن الأحداث ممكن تكون مؤلمة نفسياً له.
