Shut In : تعمل ايه لو دخلت مواجهة مع.. نفسك

أصعب المواجهات هي المواجهات اللي بيضطر الانسان يخوضها ضد نفسه. علشان النفس لما بتعلن الحرب علينا بتكون حرب داخلية، عكس العدو الخارجي الواضح اللي الانسان بياخد حذره منه. ويعمل له ألف خطوة دفاعية.

هي دي المشكلة اللي وجدت جيسكا (قامت بالدور ريني كوالي) نفسها فيها، لما اتحبست في  غرفة بدروم شقتها، لوحدها، بينما طفلتها الصغيرة ورضيعها في غرفتهم، في وجود شخص متحرش بالأطفال حر طليق في المنزل!

بينما يتوقع أي حد يسمع القصة، أن الصراع الأساسي بين جيسكا والمتحرش، لكن الحقيقة أن صراعها الأساسي كان بينها وبين نفسها، وأنها مدمنة سابقة، وضعتها الظروف مع جرعة مخدرات في غرفة مغلقة. مش بس المواجهة كانت مع المخدرات، لكن مع القناعات الدينية والإنسانية لجيسكا. ودي نقطة القوة اللي لعب عليها فيلم Shut In.

نوعية الأفلام زي Shut In بتكون أفلام منخفضة الميزانية، متنكرة في صورة أفلام مش محتاجه فريق عمل كبير. بنتكلم هنا عن فيلم كامل اتعمل بـ ٧ ممثلين فقط. والتصوير بدون مشاهد خارجية تقريبا، وفي ديكور واحد معظم الوقت. ورغم ده الحبكة والقصة تغلبت على الميزانية القليلة واستمتعنا بالفيلم. والفضل هنا يعود للكتابة العظيمة من ميلاني توست.

الأداء التمثيلي من ريني كوالي كان عظيم، والطفلة لوسيانا فانديتي عملت دور جميل رغم أنها ما ظهرتش في مشاهد كتير. ولولا تمثيلهم الجميل كان شعورنا ببطء إيقاع الفيلم هايكون أكبر. وهي دي النقطة السلبية اللي لاحظناها في الفيلم.

Shut In بينضم لقايمة طويلة من الأفلام اللي قدرت تجمع بين الميزانية القليلة وحفاظها على شغف الجمهور بيها، لكن أقل مقارنة بينة وبين أفلام زي Buried أو Don’t Breathe  هانلاقي أن الأفلام دي تفوقت على Shut In والسبب هنا في الإيقاع. لأن رغم أن قصة الفيلم قوية جداً ومُبشرة وليها أبعاد فلسفية كتير، لكن إيقاع الفيلم كان واقع، ولو شوفنا الفيلم بضعف السرعة اللي بيتم عرضه بيها ما كناش هانحس بأي اختلاف، ودي سقطة كبيرة من المخرج  دي.جيه. كاروسو

أخر كلامنا، قبل ما نسأل نفسنا عن تصرفنا لو لقينا نفسنا محتجزين في غرفة زي جيسكا، لازم نسأل نفسنا، هل احنا جاهزين للدخول في حرب مفتوحة ضد نفسنا؟