Sicario : عالم الجريمة والخداع فى المكسيك
على الرغم من كونها المستنقع الاكثر صعوبة والمشكلة المؤرقة لامريكا هى مشاكل المخدرات والهجرة غير الشرعية من المكسيك، الا انه يبدو ان مصائب قوم عند قوم فوائد، والمشكله اللى بتخلى ظباط الجيش والشرطة مش بيناموا بالليل –ده غير اهل السياسة- هى نفس المشكلة اللى بتخلى اهل السينما يربحوا الملايين من خلال انتاج افلام بتتكلم عن الازمة دي.. وطبعا فيلم اليوم يعتبر اكبر مثال على ده.
من اخراج دينيس فيلنوف وبطولة بينيسيو ديل تورو و إيميلي بلانت و جوش برولين و جيفري دونوفان بنشوف قصة ظابطة شرطة بتقرر تطارد المسئولين الحقيقيين عن تجارة المخدرات فى المكسيك واللى بتحد طريقها للولايات المتحده.. (كيت) او ايميلي بلانت بتجد نفسها فى مواجهات اكثر شراسة على مستوي الاكشن، او حتي على مستوي التربيطات السياسية مع رجال العصابات ورجال الشرطة والمسئولين الحكوميين الفاسدين فى داخل امريكا نفسها.. وهنا بيبدأ الفيلم فى بيان وجهة نظره الاساسية.
المشهد الافتتاحي للفيلم بيستعرض لنا كم الفظائع اللى بتجدها الشرطة فى مداهمة احد اوكار تجارة المخدرات. بداية من الجثث المتعفنه وراء الجدران او حتي الانفجار الكبير اللى بينهي المشهد، وكلها امور بتجعلنا لا نوصي بمشاهدة الفيلم للصغار خاصة انه بيحتوي على مشهد جنسي طويل نسبياً فى منتصف الاحداث تقريبا.
الأداء التمثيلي للابطال كان متميز فى واقع الامر، وحسينا ان اختيارهم كان من افضل الامور اللى حصلت فى الفيلم، لان كل فنان قدر يملى مركزه ويقوم بدوره بشكل رائع ومتقن، لكن الحوار كان متكلف بعض الشىء وفيه بعض الرموز اللى حسينا ان الناس العادية مش بتتكلم بالاسلوب ده خصوصا لو كانوا رجال شرطة او مخابرات او مباحث، وكلها مهن فيها كتير من الاحتكاك والعنف، الامر اللى بيخلى نوعية الحوار بين الاشخاص اللى بيشتغلوها مش بالرمزية او الرقي ده ان شئنا الدقة.
الموسيقي التصويرية كانت باهته ولم تقدم جديد وحسينا انها كان المفروض تكون اقوي وافضل بما يتناسب مع طبيعة الفيلم واحداثه المتلاحقة.. واخر ملاحظاتنا السلبية كانت عن بعض الملل اللى تسرب لنا خصوصا فى النصف الاول من الاحداث واللى لم يكن بسخونة باقى الفيلم عدا المشهد الافتتاحي.
Sicario بالمكسيكية يعني قاتل محترف.. وبالنسبة لنا Sicario على الرغم من كونه مش افضل فيلم اكشن فى التاريخ، لكن فيلم قوي يستحق المشاهده رغم بعض العيوب اللى ذكرناها.
