Sing : الأغاني سر نجاح الفيلم

الحقيقة أننا نقدر نعتبر سنة 2016 واحدة من أكتر السنوات انتعاشا فى مجال انتاج أفلام الأنيميشن.. السنة دي استقبلت عدد متميز من أفلام الأنيميشن اللى نقدر نعتبرها أفلام ناجحة ومؤثرة وليها جمهور متميز وحضور رائع فى قاعات العرض السينمائى… ماينفعش  نستثني Sing من الأفلام دي… والسر فى الأغاني والموسيقي!

Sing من تأليف وإخراج  جاريث جينجس ومن أداء صوتي لـ  ماثيو ماكونهي و ريز ويذرسبون و سيث ماكفرلين و سكارليت جوهانسون و جون سي رايلي و توري كيلي.

الفيلم بيحكي عن عالم الحيوانات، والمسابقة العالمية فى الغناء واللى بيقيمها أحد الحيوانات فى محاولة أخيرة –ويائسة- لإنقاذ المسرح اللى بيملكه ويديره من الإفلاس… القصة مش مهمة بقدر ما الأغاني والإستعراضات كانت المسيطرة على أحداث الفيلم.

الميزة فى فيلم Sing أنه يصلح تماماً للمشاهدة من الكبار والصغار على حد سواء.. الفيلم هايعجب المشاهدين والمستمعين من أي سن واهتمامات.. عارفين ليه؟ علشان الفيلم معتمد فى المقام الأول على المزيكا والغناء، والموسيقي لغة قائمة بذاتها مش محتاجه أى مجهود لفهمها والتواصل معها.. وهو ده اللى حسيناه لما بدأت أجسادنا تتحرك على إيقاع الموسيقي والأغاني المختلفة والمتنوعة واللى شوفناها على مدار أحداث الفيلم.

ماينفعش بأي حال من الأحوال ننسي دور الرسومات المتقنة، والألوان المبهرة واللى نقدر نعتبرها كرنفال من الألوان اللى غزت الشاشة طوال وقت عرض الفيلم تقريبا، والتحريك المتميز للشخصيات ورسمها بدقة جعلتنا مستمتعين بكل تفصيلة من تفصيلات الفيلم.. أما الأداء الصوتي للشخصيات فكان متميز الى اقصى درجة، وخاصة الجميلة سكارليت جوهانسون واللى مشهور عنها الأداء الصوتي المتميز لها فى أفلام الأنيميشن أو حتي الأفلام العادية زي فيلم Her.

فيلم Sing فيلم ناجح ومتميز وهايقدر يثبت نفسه فى شباك التذاكر لفترة كويسة، خاصة توقيت عرضه اللى بييجي فى وقت متناسب مع موسم الأعياد، وهو موسم بيجذب المشاهدين ومحبى السينما لقاعات العرض للإستمتاع بأفلام مختلفة ومتميزة، خاصة من الفئات العمرية الاصغر سناً، واللى هاتلاقى فى sing فرصة متميزة لتقضية وقت ممتع وسماع أغاني مختلفة وجديدة.

علشان تبقى عارف:

• احتل الفيلم المرتبة الثانية فى البوكس أوفس الأمريكي بإيرادات 56 مليون دولار
• الفيلم يعتبر ثاني فيلم رسوم متحركة للممثلة (سكارليت جوهانسون) بعد فيلم (The SpongeBob SquarePants Movie) عام 2004.