Skyscraper: لو بتخاف من المرتفعات ما تشوفوش!

على الرغم من شهرة المخرج روسون مارشال ثيربر في تقديم الأعمال الكوميدية، إلا أنه نجح في تقديم تجربة جيدة جدا ومبشرة في أول عمل غير كوميدي له. تعالوا نتعرف أكتر على Skyscraper ورأينا بخصوص أحداثه وتفاصيله.

Skyscraper من بطولة دواين جونسون، نجم الأكشن المشهور واللي بيقدر يقدم كتير من الأدوار الخاصة بالعضلات والقوة نتيجة خبرته السابقة في المجال الرياضي وبالتحديد في مصارعة المحترفين – ومشهور باسم The rock  – قبل ما يتجه للتمثيل ويقدر يقدم أعمال قوية ومميزة.

جونسون بيقدم في الفيلم شخصية ويل سوير واللي بيحاول ينقذ أسرته من سلسلة من الأعمال الأجرامية اللي بتدور في ناطحة سحاب عملاقة تعد هي الأطول في العالم.

بنعيب على الفيلم أن أي حد يتفرج على التريلر الخاص به هايقدر يستنتج كتير من أحداثه ويفهم كتير من التفاصيل. لكن بشكل عام المتعة في متابعة أحداث الفيلم مش في معرفة التفاصيل بقدر ما هي في طريقة اخراج مشاهد الفيلم وهنا تكمن مهارة المخرج.

المخرج روسون مارشال قدر يوظف القصة اللي كتبها بنفسه علشان يظهر نقاط القوة في الفيلم وهي المشاهد اللي لها علاقة بالمرتفعات والمخاطر اللي ممكن تحصل فيها. وحقق نجاح كبير في الوصول لهدفه لكن زي ما قولنا على حساب عدم شعور المشاهد بالمفاجأة أو الالتواء في الأحداث Plot twist. يعني الفيلم قابل للتوقع بدرجة كبيرة.

الموسيقى والديكورات كان لها نصيب الأسد في قوة أحداث الفيلم، ولا يمكن ننسى طبعا الخدع  السينمائية وفريق الدوبليرات اللي بذلوا مجهود خرافي علشان نقتنع  كمشاهدين بكل مشهد بنشوفه.

فيلم Skyscraper فيلم مميز وقوي لكن مش بننصح به – بالتأكيد – للناس اللي بتخاف من المرتفعات وناطحات السحاب والمناطق العالية بشكل عام.

علشان تبقى عارف: الفيلم يعتبر  أول تعاون بين النجم (دواين جونسون) والمخرج (روسون مارشال) منذ فيلمهما (Central Intelligence) عام 2016.