Smallfoot: أتمسك بحلمك حتى لو الكل وقف ضدك

من أكتر الحاجات اللي بتعجبنا في بعض أفلام الأنيميشن، أن القصة والأحداث يمكن فهمها وتفسيرها على أكتر من مستوى. يعني الأطفال لو شافوا الفيلم هايشوفو فيه فيلم برسومات جيدة وألوان تجذب العين، والكبار هايشوفوا فيه إسقاطات على قضايا كتير بتشغل تفكيرنا وحياتنا. قضايا ممكن يكون لها علاقة بالسياسة أو حتى الدين. تعالوا نتعرف أكتر على Smallfoot

Smallfoot بيحكي عن مخلوق (اليتي) العملاق، واللي بيعيش حياة رتيبة مع أسرته وقبيلته اللي بتعيش في معزل عن البشر. لدرجة أن أجيال كاملة من المخلوقات دي كان البشر بالنسبة لهم مجرد كائنات خرافية مش موجوده غير في الخيال. كل ده بيتغير لما بيقرر واحد من المخلوقات دي أنه يتعرف على عالم البشر عن قرب.. ياترى ايه ممكن يحصل له؟!

زي ما قولنا من أفضل الأمور اللي عجبتنا في تأليف وإخراج كاري كريكباتريك هي ملائمة الفيلم لمستويات مختلفة من المشاهدة. ودي حاجه مش سهلة أنه يتم تقديمها في فيلم، خاصة لو كان فيلم أنيميشن يعني مطلوب من الممثلين التمثيل بصوتهم فقط

على ذكر الممثلين. عجبنا جدا الأداء الصوتي لـ(تشانينج تاتوم) في دور ميجو، وزندايا في دور ميتشي، وطبعا يارا شهيدي في دور بريندا. وبشكل عام الأداء الصوتي لمعظم أبطال الفيلم كان جيد وعلى مستوى عالي. وقدر الأبطال يجعلونا نشعر بكل جملة حوارية خاصة مع المونتاج القوي اللي ربط مشاهد الفيلم مع بعضها.

على صعيد أخر رسومات الفيلم والجرافيكس كانت متميزة. صحيح كنا نتوقع بعض المشاهد تكون أكثر حيوية وسرعة، لكن ده لا ينفي أن معظم مشاهد الفيلم كانت ممتعة، والجرعة الكوميدية كانت متوازنة مع باقي عناصر الفيلم.

Smallfoot فيلم أنيميشن جيد وبيناقش أفكار جديدة ومختلفة وعلى مستويات مختلفة على حسب المشاهدين وأعمارهم.

نصيحة كايرو٣٦٠: تقييم الفيلم على موقع IMDB  هو ٦.٨ من ١٠