Solo: A Star Wars Story : فيلم جديد لعشاق سلسلة حرب النجوم
سلسلة أفلام حرب النجوم أو Star Wars تعتبر واحدة من مناجم الدهب اللي هوليود لازم تدخل فيها كل فترة وتستخرج لنا فيلم جديد من السلسلة دي. استغلالا لنجاح السلسلة الاصلية اللي حققت ملايين المشاهدات ومليارات الدولارات حول العالم، وقدرت تكون جمهور ضخم ليها مش بس في الولايات المتحدة لكن في كل مكان في العالم.
فيلم Solo: A Star Wars Story بيستعرض الاحداث بعد لقاء هان سولو و تشوباكا والمغامرات اللي بيخوضوها مع بعض. المغامرات اللي هاتحط كتير من النقط على الحروف فيما يتعلق بالأحداث الخاصة بالسلسلة بعد كده.
ماقدرناش نبعد عن نفسنا فكرة أن الفيلم يعتبر محاولة استغلال لنجاح السلسلة في تقديم أحداث جديدة تمت بعد أو قبل الأحداث الرئيسية. وبقدر ان دي فكرة مشروعة ومفهومة في السينما التجارية، لكن من ناحية تانية حسينا ان الفيلم كان ممكن يقدم فكرة أفضل من كده أو أن الجودة النهائية للفيلم تكون أفضل من اللي شوفناه على الشاشة خاصة على صعيد السيناريو والأحداث.
المخرج رون هوارد حسينا انه اهتم بفكرة انه يقدم فيلم له علاقة بحرب النجوم اكتر من اهتمامه بتجسيد القصة اللي كتبها جون ولورانس كاسدان بشكل كامل على الشاشة. لكن من ناحية تانية قدر يقدم مشاهد أكشن ومطاردات قوية ومميزة.
الأداء التمثيلي لابطال الفيلم ألدن إرينيرك و دونالد جلوفر و إميليا كلارك و ثاندي نيوتن و وودي هاريلسون كان جيد وقدروا يقوموا بالشخصيات المطلوبة منهم باحترافية عالية وباداء مميز وقوي وقادر على جذب الجمهور.
الخلاصة انك لو كنت من محبي سلسلة أفلام حرب النجوم هايعجبك فيلم Solo: A Star Wars Story بشدة، أما لو كانت أفلام الخيال العلمي بشكل عام مش بتستهويك، الفيلم مش هايكون الخيار الأول بالنسبة لك في المشاهدة.
علشان تبقى عارف:
تم اختيار (وودي هارلسون) بعد (كريستيان بايل) ليقوم بدور معلم (هان سولو).
