Spectre: جيمس بوند يضرب السينمات.
العالم ممكن تحصل فيه تطورات كبيرة وكتيره.. لكن جيمس بوند لا يمكن يتغير ابدا! هايفضل بقوته وقدراته الاسطورية والمخترعات الحديثة اللى بتظهر فى افلامه والسيارات اللى بتطير فى الجو والبنات اللى بتترمي فى حضنه اول ما تشوفه.. كل الامور دي هاتفضل زي ما هى دون تغيير.. ويمكن ده العنصر اللى بيجذب المشاهدين حتي اليوم.
المخرج سام ميندز هو مخرج الجزء السابق من السلسلة بعنوان Skyfall وكان فى رأينا واحد من افضل ما تم تقديمه عن جيمس بوند فى تاريخ السلسلة. وفى الجزء الجديد اللى شوفناه مؤخراً بيستكمل ميندز القصة من حيث انتهت فى (سكايفول). بالتالى احنا بننصح بشده اي حد عاوز يدخل Spectre انه يشاهد skyfall الأول علشان يفهم 100% من الأحداث.
الفيلم بيبدأ بمشاهد افتتاحية معروفة لكل محبى جيمس بوند.. مطاردة فى مدينة مكسيكو فى يوم احتفال شعبى بيعرف باسم (يوم الموتي).. المشهد بيبدأ كالعادة بمطاردة على الأقدام وبينتهي بمطاردة فى الجو وسط كتير من الطلقات المضروبة والمباني المهدومة.. بعد المشهد اللى بيخطف الأنفاس بتبدأ التترات اللى غناها سام سميث بعنوان Writing’s On The Wall واللى تعتبر أسوأ اغنية وأسوأ تتر فى سلسلة افلام جيمس بوند بالكامل!
الفيلم بيحكي عن عميل الاستخبارات البريطانية الشهير جيمس بوند او دانيل كريج، واللى بيسعي لتتبع والقضاء على منظمة تجسس اجنبية هى منظمة (الشبح) او spectre واللى بيحمل الفيلم اسمها وسبق وظهرت فى اجزاء سابقه وقديمة من سلسلة افلام جيمس بوند.
دانيل كريج بيقدم اداء تمثيلي معروف منه. ومن الواضح انه مسك تفاصيل شخصية جيمس بوند كويس وهايعرف يعيد تقديمها بشكل متميز، على الرغم من اعلانه ان الفيلم قد يكون اخر مره له تقديما للشخصية دي، لكن من ناحية تانية كريستوفر والتز فى اداء شخصية الشرير فى الفيلم كان ضعيف جداً واضعف من توقعاتنا بشكل ضخم، وحسينا انه كان ثابت عند اداؤه فى inglourious basterds كشخصية شريرة، وحاول يقدمه من جديد لكن النتيجة كانت باهته، خاصة ان زمن ظهوره كان متأخر نسبياً.
بالنسبة للشخصيات النسائية مع بوند او Bond Girls زي ما بيتم تسميتهم.. اداء مونيكا بيلوتشى كان باهت وضعيف على الرغم من اسمها المدوي، وشهرتها الطاغية واهتمام المتابعين بيها بعد اعلان مشاركتها فى الفيلم، لكن البطولة النسائية الحقيقية كانت من نصيب الفرنسية ليا سيدو، واللى قدرت تقدم دورمتميز وتسيطر فيه على انفعالاتها اللى كانت متغيرة ومتقلبه طوال فترة ظهورها على الشاشة.
على العكس من skyfall المخترعات الحديثة كان لها دور كبير فى الفيلم، بداية من السيارات المدهشة اللى لها امكانات خارقة واللى بيتم صنعها خصيصا لافلام بوند، ونهاية بالساعات المتفجرة واللى بتعمل امور عجائبية، وكلها كانت امور بدأت فى الاندثار فى افلام بوند السابقة، لكن تم اعادة تقديمها مع اعادة تقديم شخصية (كيو) المسئولة عن كل الاختراعات دي.
لو كنت من محبى جيمس بوند وشوفت skyfall فقط الفيلم هاتحس انه اعادة انتاج للفيلم ده. ولو كنت متابع للسلسله القديمة قبل اعادة تقديمها هاتحس انك بتتفرج على مشاهد مقتبسة من باقى اجزاء السلسلة وبيتم اعادة تقديمها من جديد.. اما لو كنت ماتعرفش عن جيمس بوند الا اقل القليل ودخلت الفيلم لمجرد مشاهدة فيلم اكشن.. هايعجبك الفيلم جداً.
