Speed Kills : بلاش تشوفوا الفيلم بتوقعات عالية
في رأينا أن مافيش أحلى من فيلم مبني على قصة حقيقية يقوم ببطولته نجم شهير وعالمي زي جون ترافولتا. خاصة لما تكون القصة مبنية على قصة حياة دونالد أرونوو واحد من الأشخاص المثيرة للجدل واللي تم انتاج أفلام وثائقية ونظريات كتير عن حياتها ووفاتها.
لكن للأسف التوقعات العالية هاتتحطم على صخور الفيلم اللي شوفناه. واللي للأسف كان أقل من توقعاتنا لدرجة كبيرة. وكان من الواضح أن المخرج جودي سكارفيلد مكانش مدرك أهمية الفيلم اللي بيقوم بإخراجه أو مدى ترقب المشاهدين له.
الفيلم بيحكي عن حياة بن ارونوف بطل سباقات الزوارق والمليونير اللي بيعيش حياة كلها انغماس في الملذات. وفي نفس الوقت بيدخل في تجارة المخدرات مع مجموعة من العصابات اللي تعتبر الأخطر على مستوى العالم
من أهم مشكلات الفيلم كانت السيناريو الضعيف. واللي تنفيذه على الشاشة كان مهلهل بشكل واضح وفيه ثغرات كتير. ولو كان الاهتمام بإخراج الفيلم تم بنفس الاهتمام اللي تم تقديم التريلر او الإعلان الخاص بالفيلم به كان ممكن حاجات كتير تتغير.
لكن علشان نقول الحقيقة جون ترافولتا قدم أداء تمثيلي قوي. قد لا يكون الأفضل في تاريخه لكن من ناحية تانيه لازم نحط عامل السن (ترافولتا بيقترب عمره من السعبين) في الاعتبار. ونقدر نقول أن ترافولتا قدم أداء جيد مقارنة بسنه
للأسف الشديد Speed Kills نواة فيلم جيد جدا. فقط لو تم الاهتمام بالفيلم على صعيد الإخراج والسيناريو بما يتناسب مع أهمية الفيلم والشخصية اللي بيحكي عنها