Split : جولة جديدة للرعب النفسي!
كان بقى لنا كتير ماشوفناش فيلم رعب قائم بالأساس على سبب نفسي.. وكنا تعبنا من أفلام الرعب اللى اعتمادها الأساسي على مشاهد القتل، أو حتي اللى كل قصصها عبارة عن أشباح بتستحوذ على أرواح أطفال صغيرة!
فيلم Split من إخراج نايت شايملان، ومن بطولة جيمس ماكافوي و جيسيكا سولا و براد ويليام هينك و نيل هوف.
الفيلم بيحكي عن (كيفين).. الشاب المصاب بمرض نفسي بيخليه يعيش أكتر من شخصية، وينتحل كل شخصية بشكل كامل من الألف للياء، الأمر اللى بيخليه يتحول من شخصية للتانية بسرعة مسببة للرعب فى كتير من الأحيان.
نتيجة مرض كيفين بيقوم بخطف مجموعة من البنات أثناء خروجهن من المدرسة بصحبة والدهم، ومن ثم بيحتجزهم فى مكان مهجور ويبدأ فى ممارسة جنونه عليهن.. ومن هنا بيتولد الرعب فى الفيلم، خاصة مع محاولة الطبيبة النفسية المعالجة لكيفين محاولة تحسين حالته، فى نفس الوقت اللى بتبذل فيه البنات الجهد الأكبر للهرب من مكان الإحتجاز.
زي ما قولنا الرعب فى الفيلم كله متركز بالأساس على القصة وعلى الأداء التمثيلي، علشان كده لازم نشيد بالمجهود الممتاز فى الأداء التمثيلي للبطل جيمس ماكافوي وقدرته المتميزة على تقمص عدد كبير من الشخصيات، والأنتقال بينهم بالشكل اللى شوفناه على الشاشة، وقدرته على إدارة السيناريو والتحكم فى مشاهد كاملة وقدرته على توصيل مشاعره بنظرات عينه فقط فى بعض الحالات.
لكن علشان ساعات أهم نقطة فى الفيلم بتكون نقطة ضعف بحد ذاتها.. إهتمام المخرج بعامل التمثيل أثر على إهتمامه بعوامل تانية زي السيناريو وخط سير الأحداث اللى حسينا أن فيه كتير من التعرج، ناهيك عن عدم منطقية كتير من الأحداث واللى تجاوزها السيناريو بدون تفسير منطقي، ده غير نهاية الأحداث اللى سابت كتير من الخيوط مفتوحة بدون إجابة شافية.
على الرغم من الأهمية الكبيرة اللى ممكن تلعبها الموسيقى التصويرية فى أحداث زي دي، إلا أن دورها كان باهت جداً وغير مؤثر بالمرة، على العكس من الديكورات اللى كانت قوية ومؤثرة، ونقلت لنا الإحساس بالعزلة والأختطاف، وساعد على إظهار عوامل قوة الديكور، الإختيار الجيد لزوايا التصوير وتصميم الكادرات اللى أظهر تمكن الإخراج.
Split فيلم متميز على الصعيد التمثيلي، ويستحق المشاهدة كنوع مختلف من أفلام الرعب، بعيداً عن أفلام الصدمات والأصوات العالية والأشباح المصنوعة بالجرافيك!
