Spooks: The Greater Good : لعبة المخابرات والجاسوسية
دائماً وأبداً افلام الجاسوسية بتهمنا وبنحبها. يمكن بتفكرنا بذكريات قديمة مع ادهم صبري او (رجل المستحيل)، سلسلة الدكتور نبيل فاروق اللى فتحت عنينا على اعمال المخابرات ومباريات الذكاء والأكشن اللى بتدور بين اجهزة المخابرات حول العالم.
من اخراج بهارات ناليوري وبطولة كيت هارينجتون و إلياس جابل و جينيفر إيهيل بنشوف قصة صراع قوي بين جهاز الاستخبارات البريطانية MI5 وبين المخابرات الأمريكية، بحثاً عن ارهابى من اصول عربية اسمه (قاسم) بيقوم بتنفيذ عدد من العمليات الارهابية العنيفة داخل المملكة المتحدة.
الفيلم بيستعرض فى عملية الصراع اللى بتدور خلال احداثه مباريات الذكاء –اللى بتصل لحد استخدام القوة احيانا- بين اجهزة المخابرات المختلفة. ايضا بيتعرض للخيانات والصفقات المستترة اللى بيعقدها رجال المخابرات –ومدرائهم فى حالات كثيرة- الامر اللى بينتج عنه احداث كارثية وعمليات ارهابية بتغير من احوال بعض الدول بالكامل.
من البداية للنهاية الفيلم بيرفع لافتة عدم الثقة فى اى شخص. وكل ما نشعر بالثقة نحو عميل او مدير فى الاستخبارات نكتشف انه له علاقة بشكل مباشر –او بشكل غير مباشر- ببعض الاتفاقات والعمليات القذرة اللى بتتم بين سطور الأحداث.
الديكورات كانت متميزة. واختيار اماكن التصوير كان رائع. الكاميرا ايضاً كانت بتعرض زوايا واسعة ومختلفة للصور. وكان واضح فيها المجهود المبذول لخلق حالة من الاثارة والتشويق فى الفيلم. وده اللى حصل فعلا بالشكل اللى خلانا عندنا ترقب طوال الوقت لسير الأحداث. على الرغم من قدرتنا على توقع واستنتاج عدد كبير من الاحداث. لكن المتعة كانت اهم من السيناريو.
يعيب الفيلم اننا فى بعض المشاهد اًصبنا بعدم الفهم واختلطت علينا بعض الاحداث. ايضاً قدرتنا على استنتاج الاحداث –على الرغم من قلة اهميتها زى ما قولنا- الا انها اصابتنا بحالة من الملل خصوصا فى النصف الأول من الفيلم. كمان كنا نتوقع جرعة اكبر من الاكشن لكن الفيلم كان بينتصر للعب على جزء الذكاء فى اعمال اجهزة المخابرات باكتر مما بيعتمد على جرعة الأكشن. اخر الامور اللى بنعيبها على الفيلم هى اظهار العرب والمسلمين بصورة الارهابيين اللى مافيش وراهم غير تنفيذ العمليات الارهابية فى كل مكان. وهى “الموضة” اللى بدأت تظهر فى هوليود خاصة بعد احداث 11 سبتمبر.
باختصار : الفيلم ممتاز لمحبى افلام الجاسوسية وصراع العقول. مع لمحة معقولة من الاكشن المحترم. لكن الفيلم محتاج تركيز علشان تقدروا تفهموا احداثه بالكامل.
