Spy : السخرية من افلام التجسس

ياتري ايه اكتر الافلام اللى تصلح للسخرية منها وتقليدها باسلوب كوميدي والتريقة على تفاصيلها؟ بالظبط كده… الافلام الاكثر جدية والاكثر عقلانية والاكثر اهتماما بالتفاصيل … زى افلام الجاسوسية مثلا… وده المنطق اللى اتبعه فيلم Spy، شوف اكتر الافلام اغراقاً فى الجدية، وتناولها بسخرية منقطعة النظير.

من اخراج بول فيج وبطولة ميليسا مكارثى وجيسون ستاتام بنشوف قصة موظفة فى المخابرات كل شغلها هو ارشاد العملاء السريين والجواسيس فى مهامهم المختلفة، وعلى الرغم من اهمية شغلها الا انها طوال الوقت بتشعر بالملل والرغبة فى تغيير نمط حياتها، الامر اللى بيجيلها على طبق من ذهب لما بيتعرض العميل اللى بتشتغل معاه للقتل فى ظروف غامضة، وبيتم ارسالها فى مهمة لمعرفة مين اللى قتله ومين قادر يعرف كل عملاء المخابرات المشاركين فى العمليات… ومن بعدها بتتوالى الاحداث.

من الامور اللى ضايقتنا فى الفيلم عدم اهتمامه بالتفاصيل او المنطق او حتي اهتمامه بالتحديد فيما يتعلق بالسيناريو والقصة، كل اللى اهتم بيه صناع الفيلم هو تقديم اكبر جرعه من الكوميديا والمشاهد المضحكة خلال الاحداث ومش مهم اى شىء اخر.

وعلى النقيض من الاهتمام بالقصة والسيناريو، كان الاهتمام بمساحة الكوميديا فى ادوار جميع المشاركين من الامور اللى عجبتنا فى الفيلم، والغريب ان مساحة الكوميديا لـ(جيسون ستاتام) كانت متميزه جدا وكان معظم الموجودين فى قاعة العرض بينتظروا ظهوره ويتفاعلوا مع المشاهد بتاعته، واللى عرفناه بعد كده ان المشهد اللى كان بيحكي فيه عن خبراته السابقه بشكل كوميدي ووصفه للعمليات الغير منطقية اللى قام بها، كلها مشاهد  حقيقية قام بيها (جيسون) فى افلام سابقه له!

(ميليسا مكارثى) بتعتمد فى معظم الوقت على تكوينها الجسدي وملامحها لتوليد دفعات من الكوميديا المعتمدة على التناقض بين شكلها وبين وظيفتها، وهو الامر اللى اثار ضحكنا فى كتير من الاحيان لكن لا ننكر اننا شعرنا احيانا ببعض الملل خصوصا فى منتصف احداث الفيلم.

Spy فيلم كوميدي ساخر، بيعتمد على السخرية من افلام الجواسيس وخصوصا افلام جيمس بوند.. ترتيبنا له هايكون دائما فى مرتبة متوسطة بين افلام الكوميديا.