Star Wars: The Rise Of Skywalker : هل ده أحسن ختام لسلسلة حرب النجوم؟
لازم نعترف لكم أننا مش من الناس اللي تابعت سلسلة حرب النجوم من بدايتها وحتى اليوم. لكن ده لا يمنع أعترافنا بأنها واحدة من أهم وأكبر سلاسل الأفلام وأكثر تأثيرا. مش بس على قطاع واسع من المشاهدين لكن على صناع السينما كمان. لكن السؤال المهم هو: هل Star Wars: The Rise Of Skywalker يعتبر أحسن ختام للسلسلة دي؟
Star Wars: The Rise Of Skywalker بيقدم قصة تقليدية عن الحرب بين (المقاومة) من جهة وبين (النظام الأول) من جهة تانيه. لكن المواجهة المرة دي بتكون حاسمة ونهائية. وفي نفس الوقت بتحاول كل الأطراف تواجه ماضيها وتتصالح معاه.
المخرج جي. جي. أبرامز وضع على عاتقه مهمة اخراج جزء أخير بيحاول فيه أنه يقفل كل خطوط السلسلة. وفي رأينا أنه كان غلط منه أنه يحاول يرضي كل الأطراف. لأن في النهاية مستحيل يوصل لسيناريو يعجب ملايين المشاهدين حول العالم. خاصة أن قطاع كبير منهم متابعين دائمين للسلسلة.
مبدئيا لازم تكونوا شوفتوا باقي الأجزاء السابقة علشان تفهموا وتتابعوا وتستمتعوا بالجزء الأخير خاصة انه بيقدم سلسلة من مشاهد النوستالجيا اللي بتداعب شعور متابعي السلسلة القدامى وبتقدم لهم تمهيد للنهاية.
لكن ماعجبناش في الفيلم الاستعجال الغير عادي في الاحداث. حتى اننا بنشوف أحداث مهمة جدا بتحصل خلال ثواني تقريبا على الشاشة. وده أعطانا انطباع أن فيه حشو كتير للأحداث علشان نشوف كل حاجة في حوالي ساعتين ونصف فقط.
أما محبي مشاهد الصراع بسيوف الليزر والخدع السينمائية هايشوفوا كتير منها مع أداء قوي من كل ابطال الفيلم تقريبا. وعجبنا في الأداء ان كل شخصية كانت عارفه كويس تاريخ شخصياتها مع السلسلة وبتقدم لنا الأداء من خلال وعيها الكامل بتطور الشخصية على مدار السلسلة.
Star Wars: The Rise Of Skywalker مش هايعجب كل محبي سلسلة حرب النجوم. لكنه حاول يقدم افضل ختام ممكن للسلسلة.
