Stardog And Turbocat : السوبر هيرو المرة دي… كلب!
الأفلام اللي بتحكي عن الأشخاص اللي عندهم قدرات خارقة أصبحت أكتر من الهم على القلب. لكن الجميل في Stardog And Turbocat أنه بيحكي لنا عن كلب بيتحول لسوبر هيرو. والجميل أن صناع الفيلم قدروا يتناولوا القصة بشكل جميل ومختلف.
Stardog And Turbocat بيحكي عن كلب اسمه بادي (قام بالأداء الصوتي للشخصية نيك فورست) بيتم اطلاقه للفضاء. في رحلة يبدو أنها بلا عودة. لكنه بيقدر يرجع للأرض من جديد بعد حوالي ٥٠ سنة. علشان يكتشف أن الحب بين البشر والحيوانات انتهى! ومن هنا بيبدأ رحلة في اكتشاف قدراته الخارقة اللي حصل عليها بعد رحلته الفضائية. من خلال التعاون مع قط (قام بالأداء الصوتي للدور لوك ايفانس) عنده هو كمان قدرات خارقة بتفكرنا ببات مان. ومن هنا بيبدأ التعاون بينهم. علشان يقدر بادي يرجع لصاحبه القديم.
الجميل في Stardog And Turbocat أنه يعتبر التجربة الطويلة الأولى لمخرجه ومؤلفه بن سميث. وده خلاه يجرب حاجات كتير جديدة ومختلفة. حتى أن طريقة رسم الشخصيات وحركتها على الشاشة كانت جميلة ومختلفة وجذابة للعين ومافيهاش تصنع. لكن عند مرحلة معينة في الفيلم تمنينا لو كانت الإضاءة اقوى شوية والتنوع أكبر من حيث الألوان علشان تكون مبهرة اكتر للعين وخاصة للأطفال.
الأداء الصوتي لأبطال الفيلم بيل ناي و نيك فروست و لوك ايفانز وباقي الأبطال كان جيد جدا وقدروا يقدموا لنا أداء متناسب مع شكل الشخصيات المرسومة على الشاشة
Stardog And Turbocat مش أحسن فيلم انيميشن شوفناه مؤخرا. لكنه تجربة تستحق الاهتمام وصالح للمشاهدة من الكبار والصغار على حد سواء.
