Step Up: Year Of The Dance : نسخة “صيني” من Step Up
مجرد لما بنسمع أن فيلم جديد من سلسلة Step Up أصبح متاح في السينمات، بنعرف علطول ايه اللي مستنينا. قصة متماسكة مع استعراضات مستمرة ورقص من نوع محترف جدا مع ابهار بصري رائع. لكن للأسف اللي شوفناه في Step Up: Year Of The Dance كان أقل بكتير من توقعاتنا.
Step Up: Year Of The Dance يعتبر استكمال لسلسلة أفلام Step Up اللي بتدور في غالبها في أمريكا. لكن في الجزء الجديد بنشوف النسخة الصينية من نفس السلسلة. وفي البداية كنا بنتوقع نفس المستوى من الرقص والاستعراض لكن اللي شوفناه كان عكس كده.
في Step Up: Year Of The Dance بنشوف أداء تمثيلي ضعيف. وحسينا في كتير من مشاهد الفيلم أن الانفعالات على وجوه أبطال الفيلم جامدة ومش بتتغير بتغير الأحداث. لكن مين قال أننا بنتفرج على سلسلة Step Up علشان الأداء التمثيلي أصلا؟!
حتى على صعيد الموسيقى والرقص والاستعراض مستوى الفيلم كان أقل من توقعاتنا. وحسينا أن فيه تدخل من برامج المونتاج علشان تظهر الرقصات والاستعراضات الأخيرة بالشكل اللي ظهرت عليه في الفيلم. وبشكل عام إيقاع الفيلم كان أقل بكتير من الأجزاء السابقة من السلسلة.
هل معنى كده أن مافيش أي إيجابيات في الفيلم؟ هانكون ظالمين لو قولنا كده. وبعض الاستعراضات في الفيلم كانت قوية وحسينا أننا عاوزين نحرك جسمنا مع الإيقاع. لكن عدد الاستعراضات القوية كان قليل مقارنة بالمستوى العام للفيلم
Step Up: Year Of The Dance ممكن يعجب محبي أفلام الرقص والاستعراض بشكل عام. أما مجانين سلسلة Step Up اللي بيستنوا كل جزء جديد بفارغ الصبر هايحسوا أن الجزء الجديد من السلسلة “صيني” بجد!
