Stolen: اسم على مسمى
لو عاوز تفتكر أشهر المشاهد للأفلام الأمريكية والعربية زى فيلم المشبوه أو فيلم Con Air مش لازم تنتظر الأفلام دى أنها تتعرض فى التليفزيون أو تضيع وقتك للتحميل من على الإنترنت، خد فيشارك واتفرج على فيلم Stolenوشوف نيكولاس كيدج وهو بـ يحاول يسترجع مجده الزائل.
كيدج واحد من الفنانين اللى كان مجرد ظهور اسمه على الأفيش بـ يعرفنا أننا هـ نشوف فيلم مختلف وأكشن راقى، فاكرين Face off وThe rock وLord of War وغيرها من الأعمال، للأسف بعد فيلم next كيدج فقد بريقه لحساب ممثلين فى نصف قدراته التمثيلية لأسباب لا تزال مجهولة لنا، وفيلم النهارده تجسيد حى على السقوط المريع لفنان… كان رائع.
الفيلم اللى أخرجه سايمون ويست بـ يحكى عن مجرم بـ يقرر ينقذ ابنته المراهقة من عملية اختطاف بعد خروجه من السجن، والفيلم كان ملىء بالمشاهد غير المنطقية واللى فشل المخرج أنه يحولها لمشاهد مقبولة بأى حال من الأحوال.
المزيكا والديكور ما كانوش معبرين عن الأحداث بشكل كبير، وأداء نيكولاس كيدج كان مترهل، ومشاهد كاملة كانت منقولة من فيلم Con Air اللى حقق نجاح كبير فيما مضى.
فكرة الدبدوب الهدية على سبيل المثال تنفع لدغدغة مشاعر المشاهدات المراهقات، لكن عملية التجميل السيئة اللى خضع لها كيدج مؤخرًا، ناهيك عن أن الفكرة منقوشة من فيلم ثانى خلت المشاهد دى ضعيفة ومترهلة، بالإضافة للأكشن غير المنطقى خلت كثير من المشاهدين ينفدوا بجلدهم أثناء الاستراحة وكانت آراء الصامدين للنهاية مش كويسة بخصوص الفيلم.
زى ما قولنا قبل كده لو عاوز تتفرج على فيلم مع فيشار وشوية أكشن هـ يكون الفيلم ده مناسب لك.
