Strange But True : قصة حمل أستمر خمس سنين!

لو قولنا للناس أن ممكن شخص يموت ثم حبيبته تبقى حامل منه بعد ٥ سنوات كاملة من وفاته. هايقولوا أن ده مستحيل. لكن هو ده اللي حصل في فيلم Strange But True

Strange But True بيحكي عن (ميليسا) واللي قامت بدورها مارجريت كوالي اللي بتقرر العودة لعائلة حبيبها السابق (فيليب) واللي قام بدوره نيك ربنسون علشان تقول لهم أنها حامل منه على الرغم من مرور ٥ سنوات على وفاته!

الخبر بيزلزل الأسرة وبيخلق حالة من عدم التصديق. مع فتح لسلسلة كبيرة من الأحتمالات والقصص الجانبية، واللي نجح المخرج روان آثال أنه يخلينا نتابعها بشكل شغف علشان نعرف ازاي حاجه زي دي ممكن تحصل.

المميز في Strange But True انه مش بس بيطرح الأسباب المنطقية اللي ممكن تخلي حاجه زي دي تحصل. لكن كمان بيطرح نظرية من نظريات ما وراء الطبيعة. وبيخلي المشاهدين يفكروا في كل الأحتمالات لحد ما نوصل للحقيقة.

لكن المشكلة الأساسية كانت في سيناريو ايريك جارسيا واللي طول علينا المدة اللي بنشوف فيها الأحداث لحد ما نوصل للحقيقة. التطويل ده أضر بالفيلم وخلانا نحس عند مرحلة معينة بإحساس (ما حد يقول لنا ايه اللي حصل وخلاص يا جدعان!) والشعور ده نتيجة التطويل الزائد قبل كشف الحقيقة.

من ناحية تانيه بنشوف أداء تمثيلي جيد جدا من كل أبطال الفيلم، وبنشوف بطلنا المصري مينا مسعود في مشاهد قصيرة من الفيلم. لكن حسينا بالفخر وأحنا بنتفرج عليه.

لو عندك صبر وطول بال تتابع Strange But True بدون شعور بالملل ولو أنت من الناس اللي بالها طويل بشكل عام في الحالة دي  ممكن الفيلم يعجبك.