Stratton : عودة للأكشن البريطاني!

طوال الوقت بنشعر بالحنين ناحية أفلام الأكشن البريطانية، واللي بتفكرنا طوال الوقت بسلاسل الأفلام البريطانية الشهيرة واللي بيتربع على عرشها طبعا سلسلة أفلام جيمس بوند. العميل البريطاني اللي خرج من عباءة ضابط مخابرات بريطاني تحول لأديب وهو الكاتب الكبير ايان فليمنج.

فيلم Stratton بينتمي لنوعية أفلام الأكشن البريطانية.. تعالوا نتعرف عليه عن قرب أكتر.

قصة Stratton

الفيلم بيحكي عن عميل في القوات الخاصة البريطانية بيحاول يتتبع خلية إرهابية قبل تنفيذها عمل إجرامي خطير، لكن في سبيل تتبع الخلية الإرهابية بيتعرض العميل ده لكتير من المواقف الصعبة واللي بتقربه في كل مرة من الموت بشكل محقق ومرعب.

فريق العمل

الفيلم من اخراج سايمون ويست ومن بطولة دومينيك كوبر و أوستن ستويل و جيما تشان و توم فيلتون أما التأليف فكان من نصيب وارين دافيس اقتباسا عن رواية دونكان فاكونر.

السيناريو والحوار والأخراج

إخراج الفيلم اعتمد على تقديم الأكشن بالطريقة البريطانية السريعة والمميزة، واللي سبق تقديمها في سلسلة أفلام جيمس بوند على سبيل المثال، لكن في نفس الوقت اخراج مشاهد الأكشن كان مقتبس جزء كبير منه من الأسلوب الأمريكي اللي بيعتمد على مشاهد المطاردات والاشتباكات اليدوية وتبادل إطلاق النار بشكل كبير.

أما سيناريو الفيلم وحواره فتكامولوا مع الإخراج علشان يقدموا لنا في النهاية فيلم أكشن عالي التقنية والجودة، لكن في المقابل لم يتم الاهتمام بالمواقف الإنسانية في الفيلم بقدر الاهتمام بمشاهد الأكشن والمطاردات.

الموسيقى والديكور والمؤثرات

للأسف بنعيب على الفيلم عدم قوة الموسيقى التصويرية، على الرغم من أهمية الموسيقى التصويرية في أفلام الأكشن، لكن الديكورات كانت جيدة وحركة الكاميرا كانت متناسقه مع سيناريو الفيلم السريع واللي بيقفز بينا من مشهد للتانى بسرعة البرق. وكمان المؤثرات الخاصة تضافرت مع مشاهد الأكشن علشان تقدم لنا في النهاية فيلم قوي ومميز.

الخلاصة

فيلم Stratton أكيد مش أفضل فيلم أكشن بريطاني نشوفه. لكنه واحد من الأفلام القوية واللي تستحق المشاهدة من محبي النوعية دي من الأعمال.

علشان تبقى عارف:

تقييم الفيلم على موقع IMDB كان 4.9 من 10