Submerged: تعمل ايه لو كنت مكان أبطال الفيلم؟!
عجبنا في فيلم Submerged قدرته على جذبنا وأجبارنا على المشاهدة من المشهد الأول للأخير بدون الشعور بالملل، على الرغم من أن مستواه الفني لم يكن بنفس القوة اللي كنا متوقعينها. تعالوا نتعرف أكتر على تجربتنا مع Submerged
القصة
الفيلم بيحكي عن بنت في سن الشباب بتجد نفسها مع حبيبها في مواجهة خطيرة وقاتلة مع مجموعة من المجرمين اللي بيحاولوا يعتدوا عليهم. ومع كل مشهد بتحاول تجتهد لأقصى حد علشان تنجو بنفسها وحبيبها من المصير المرعب الي منتظرهم على يد المجرمين.
فريق العمل
الفيلم من اخراج ستيفن سي ميلر ومن تأليف سكوت ميلام أما البطولة فكانت لـ جوناثان بينيت و تالوله رايلي و روزا سالازار و ويلا فورد و صامويل سي هانت و تيم دالي
الأداء التمثيلي
الجزء الأكبر من عبء الأداء التمثيلي وقع على كاهل تالوله رايلي واللي قدرت تقوم بدورها على أكمل وجه وتقدم لنا شعور المختطفة أو الواقعة في كارثة مع كل مشهد كانت بتقوم به. الجميل أن أدائها التمثيلي تضافر مع باقي عناصر الفيلم علشان يقدموا لنا في النهاية فيلم محكم وقوي، وده اللي ها نناقشه معكم.
السيناريو والحوار والأخراج
سيناريو الفيلم اعتمد على فكرة عدم ترك المشاهد للشعور بالزهق من الأحداث ولا ثانية واحده. لكن على الرغم من محاولات السيناريو انه يحقق هدفه لكن في بعض المشاهد حسينا اننا محتاجين بعض الراحة من الأكشن والتوتر. ونعتقد أن معظم اللي هايتفرجوا على الفيلم هايضعوا نفسهم مكان الأبطال ويتخيلوا ايه كان ممكن يعملوه لو كانوا مكانهم؟!
حوار الفيلم لعب دور مهم جدا في قيادة الأحداث، وعرفنا كتير عن الجوانب الشخصية والنفسية للأبطال، أما الإخراج فا قدر يستغل موهبة تالوله رايلي علشان يقدم في النهاية فيلم جيد ومتماسك.
الديكورات والموسيقى والأزياء
لكن بنعيب على الفيلم أن الموسيقى والديكورات الخاصين بيه كانوا مش بالقوة اللي متوقعينها، وكنا نتوقع منهم يكون مستواها أفضل من كده وأكتر تناسقا مع الفيلم وتماشيا معاه. لكن جمهور الفيلم اللي هو جمهور أفلام الأكشن والأثارة ممكن مايهتموش كتير بالنقطه دي.
الخلاصة
فيلم Submerged من الأفلام اللي تخليك تتسائل دايما: هاعمل ايه لو كنت مكان الأبطال؟! ننصح بمشاهدته لمحبي أفلام الاكشن والأثارة.
علشان تبقى عارف:
حوالي 1000 مستخدم لموقع IMDB أعطوا الفيلم تقييم 4.1 من 10
