Suburbicon: دراما مستوحاة من قصة حقيقية
بيعجبنا في الأفلام المقتبسة عن قصص حقيقية، قدرتها على أنها تعطينا دروس في الواقع اللي بنعيشه اليوم، وقدرتها على أنها تضع تصرفات البشر تحت الميكرسكوب وتجعلنا نسأل السؤال: لو أحنا في نفس الموقف كنا هانتصرف ازاي؟ ده كان شعورنا المسيطر مع كل مشهد من مشاهد فيلم Suburbicon
القصة
الفيلم بيحكي عن قصة عائلة من الزنوج بتنتقل للأقامة في حي مثالي مخصص للبيض في الولايات المتحدة الأمريكية، وبيرصد كافة المشاكل الأجتماعية اللي بتحصل مع تغير التركيبة (المثالية) لسكان الحي الهادىء، خاصة مع حدوث جريمة شنيعة بالتزامن في نفس المنطقة.
فريق العمل
الفيلم من تأليف ايثان وجويل كوين و من أخراج جورج كلوني وبطولة مات ديمون وأوسكار ايزاك و جوليان مور و جلين فليشلر وميجان فيرجسون.
الأداء التمثيلي
قدرت كل شخصية من شخصيات الفيلم أنها تغوص في أعماق الشخصية اللي بتقدمها على الشاشة، وده مش بيحصل بدون تدخل المخرج بشكل كبير علشان يخلق لكل ممثل من الممثلين جو خاص به وحالة سينمائية بتنعكس في النهاية على دوره وطبيعة قيامه به، وده اللي قدر جورج كلوني –لأنه ممثل بالمقام الأول- أنه يقدمه لزمايله اللي بيوجههم خلال إخراج الفيلم، وده اللي أنعكس على الأداء التمثيلي بشكل مميز.
السيناريو والحوار والأخراج
سيناريو الفيلم قدر يحافظ على لمحة من الكوميديا مع جانب كبير من الأثارة والجريمة، وبنعتقد أن الخيط الكوميدي الخفيف في السيناريو مقصود علشان الأنتقاد مايكونش لاذع جدا للمجتمع الأمريكي اللي بيشعر بالخطر من كل المختلفين معه في اللون أو الجنسية..الخ بينما كل المشكلات مش بتظهر غير منه هو شخصيا، ودي في رأينا رسالة الفيلم اللي بيحاول يوصلها في كل مشهد تقريبا.
الحوار في الفيلم كان مُركز لدرجة كبيرة، وكل جملة حوارية كان مقصود بيها رسالة قوية وتأكيد على الهدف العام للفيلم، وحسينا أن الحوار لو كان غير مباشر شويه كان ممكن يكون أفضل.
الديكورات والموسيقى والأزياء
ديكورات الفيلم وأزياؤه قدرت ترجعنا لزمن الأحداث بجدارة، خاصة الديكورات الداخلية وتصميمات المنازل والمكاتب وأماكن العمل، أما الموسيقى التصويرية واللي كانت عارفه أمتى بالظبط تتصاعد مع الأحداث وأمتى تنخفض بالرتم الخاص بها فكانت مميزة لأبعد الحدود.
الخلاصة
فيلم Suburbicon بيشرح ويحلل المجتمع الأمريكي من الداخل اعتمادا على حادثة تاريخية حقيقية. هايستمتع بمشاهدته الناس اللي بتحب أفلام الغموض والجريمة.
علشان تبقى عارف:
تعاون الممثلان (مات ديمون) و(أوسكار إيزاك) قبل كده في سلسلة أفلام (The Bourne Legacy).
