Suicide Squad : يا أشرار العالم… إتحدوا!
ايه اللى ممكن يحصل لو تحول سوبرمان لرجل شرير وقرر الهجوم على البيت الأبيض واختطاف الرئيس الأمريكي؟ ايه اللى ممكن يحصل لو كان سوبرمان القادم إرهابي؟
هو ده السؤال الأساسى اللى أعتمد عليه سيناريو الفيلم اللى أخرجه ديفيد أير وألفه جون واستراندر وقام ببطولته ويل سميث و ومارجوت روبي و جاريد ليتو وغيرهم من الفنانين، وبيحكي عن مؤسسة حكومية سرية بتجمع مجموعة من أكتر الناس شراً فى العالم للقيام بعمليات إنتحارية لحساب الحكومة، فى محاولة منهم لتدريب المجموعة على التصدي للقوي الخارقة للطبيعة لو قررت فى يوم من الأيام تعادي الولايات المتحده.
قصة الفيلم مش جديده.. شوفنا أفلام من DC و مارفل وغيرها من شركات الإنتاج الكبري واللى قدمت لنا أفلام بيظهر فيها أكتر من سوبر هيرو مع بعض، لكن المرة دي صاحب الفيلم حملة دعاية مكثفة، خاصة مع ظهور شخصية الجوكر واللى قدمها جاريد ليتو فى أداء ضعيف وغير منسجم بالمرة، وحسينا فيه بمحاولة تقليد )هيث ليدجر) الفنان اللى قام بالدور فى فيلم The Dark Knight (2008)
فى أداؤه التمثيلي كان مفترض من ويل سميث إنه يتحمل العبء الكوميدي للفيلم، وطبعا شاركته مارجوت روبى فى جزء كبير من الكوميديا والفكاهة فى الأحداث.. مارجوت شاركت ويل سميث قبل كده فى فيلم تاني هو Focus واللى تم عرضه فى 2015 وكان بيحكي عن محتال بيتمتع بموهبة غير عادية فى قدرته على سرقة الأشخاص والتلاعب بيهم.
زي ما قولنا ده كل اللى كنا نتوقعه من الأداء التمثيلي للأبطال فى فيلم كل المطلوب فيه تقديم الأكشن والمتعه لمشاهديه.. والحقيقة الفيلم قدر يقدم كتير على مستوي الإبهار التقني والخدع السينمائية ومشاهد العنف والإشتباكات وتبادل إطلاق النار، مع خلط جيد بين مشاهد الجرافيك وهجوم السحر وبين مشاهد إطلاق النار والإشتباكات اليدوية وبالأسلحة النارية.
على الرغم من قوة وتميز الموسيقي التصويرية لكن فى فيلم زي Syicide Squad كنا نتوقع الأفضل من كده، لكن الأغنيات اللى تم تقديمها فى الفيلم كخلفية موسيقية للأحداث كانت جيدة وغيرت من مودنا واحنا بنتفرج على الفيلم.
كنا نتوقع Suicide Squad يكون أفضل من كده خاصة مع حملة الدعاية المكثفة اللى صاحبت الفيلم، لكن اللى شوفناه فى النهاية كان مرضى بالنسبه لنا ويقع فى خانة الجيد جدا، بالنسبة لمحبى النوعية دي من الأفلام.
