Super Bear : بالراحة شويه على مشاعر الأطفال!

جميل أننا نعمل فيلم فيه قصة مؤثرة للأطفال. لكن لما القصة تكون مؤثرة زياده عن اللازم ممكن الوضع ينقلب للعكس ويبقى التأثير سلبي مش إيجابي. Super Bear كان أقرب ما يكون للوقوع في الفخ ده

Super Bear بيحكي عن عائلة من الدببة عايشه بسلام. لكن هجوم من مجموعة من البشر المتخصصين في صيد الدببة بيؤدي لفقد واحد من أطفال الدببة. ومن هنا بتبدأ القصة بمحاولة الدب الأب أنه ينقذ أبنه من مصير مظلم.

قصة الفيلم مش جديدة. وشوفناها بل كده في أعمال مشهورة زي Finding Nemo وغيرها. لكن في Super Bear بنشوف قدر أكبر من المشاعر الإنسانية. على الرغم من أن ده له تأثير إيجابي على المشاهدين الكبار اللي عاوزين يشوفوا مشاعر أنسانية أكبر. لكن تأثير الفيلم على مشاعر الأطفال ممكن يكون مش كويس.

مش معنى كده أن Super Bear فيلم نكد. لكن لو اللي بيشوف الفيلم طفل عنده مشاعر مرهفة ممكن الفيلم ميكونش مناسب لهم

ليه بنقول أن تأثير فيلم Super Bear أقوى؟ لأن مستوى المؤثرات الخاصة والرسوميات وتحريك الشخصيات على الشاشة كان أقل من باقي الأفلام اللي بتتناول نفس الحبكة. بالتالي تركيز الأطفال الصغار مع القصة بيكون اكبر لأنه بدون عناصر مشتته.

بالنسبة للأداء الصوتي. أداء أبطال الفيلم كان جيد. لكن مستوى ضبط الأصوات مع الشخصيات كان ضعيف وده تسبب في عدم شعورنا بقوة بعض المشاهد. وده مفهوم من فيلم ميزانيته مش كبيرة

Super Bear فيلم أنيميشن جيد لو قدرنا نتغاضى عن المشاكل اللي بتيجي مع الميزانية القليلة.. والمشاعر الجياشة!