Tabaluga : تجربة مختلفة مع أنيميشن الماني
للناس اللي زهقت من القصص المكررة في أفلام الأنيميشن الهوليودية. ممكن يدخلوا تجربة مختلفة مع الأنيميشن الألماني Tabaluga
Tabaluga بيحكي عن أميرة الجليد اللي بتدخل معركة ضد الشر بمساعدة تنين خفيف الدم لطيف الشكل.
طبعا من المستحيل اننا نتوقع من Tabaluga نفس مستوى الإبهار اللي بنشوفه في أفلام ضخمة الميزانية زي أفلام شركة بيكسار أو ديزني مثلا. ودي الحاجة اللي كان عارفها المخرج سفين أنتروالدت جونيور واللي جعلته يصمم يتميز على صعيد القصة والفكرة بدل ما يدخل منافسة غير متكافئة على صعيد التصميمات والجرافيكس.
الجميل في أنه بيحمل هدف ورسالة عن ازاي الإنسان ممكن يتغلب على خوفه وكسله ويواجه أي تحدي في حياته بقلب مؤمن بالنصر. الرسالة دي بنشوفها بطريقة خفية وسهلة الوصول للأطفال والكبار على حد سواء بدون توجيه مواعظ مباشرة. ودي من أكبر مميزات Tabaluga في رأينا.
مانعرفش كتير عن أبطال الفيلم أصحاب الأداء الصوتي. لكن عجبنا جدا كاميرون أناسيل و كريستين فيرلاي في أصوات تابالوجا و ليلي وكان أداؤهم معبر وكوميدي ومتوظف بشكل جيد مع الشخصيات اللي بنشوفها على الشاشة.
Tabaluga تجربة سينمائية مش هايحبها غير اللي عاوز يجرب (صنف) أنيميشن جديد ومختلف بعيد عن قوالب هوليود الثابتة والجامدة. شاركونا رأيكم في التعليقات.
