Tag: كوميديا خفيفة في الصيف
على الرغم من تكرار تيمة الأفلام الكوميدية المعتمدة على مجموعة الأصدقاء المجانين واللي ممكن يعملوا أي حاجه غريبة أو مجنونة في أي وقت مهما كان سنهم كبير أو حياتهم ملخبطه.. أفلام زي Last Vegas و wild hogs وغيرهامن الأفلام اللي مش بنزهق منها مهما تكررت تيمتها أو شعرنا أننا شوفناها قبل كده.
فيلم Tag بيحكي عن مجموعة من الأصدقاء بيلعبوا لعبة طويلة المدى مع بعض.. اللعبة مجنونة وبتتطلب منهم السفر في أماكن مختلفة وكتيرة، وخلال ممارسة اللعبة بتتفجر مجموعة لا تنتهي من المواقف الكوميدية والغريبة واللي خلتنا نشعر فعلا بالانطلاق والحيوية بالإضافة للكوميديا.
مخرج الفيلم جيف تومسيك كان مخلص في إخراجه لتقديم حالة من الكوميديا الخالصة في الفيلم. وده انعكس على توجيهه لابطال الفيلم جيريمي رينر و جون هام و ايد هلمس و انابيل واليس وغيرهم. وكان واضح أنهم مش بس بيقدموا شخصيات غريبة عنهم، لكن الكوميديا كانت نابعة من روح كل واحد من فريق العمل وده اللي اعطى الفيلم خصوصية وزيادة في نسبة الكوميديا.
الموسيقى التصويرية الخاصة بالفيلم كانت جميلة وحماسية. وعلى الرغم أن الموسيقى مالهاش دخل مباشر بالكوميديا في الفيلم لكن في نفس الوقت بتلعب دور مهم علشان نحس بالجو العام الخاص بالفيلم وندخل اكتر في سياق الأحداث. كمان الديكورات كانت متميزة، وانسجمت مع المونتاج اللي اعتمد على تقديم مواقف سريعة ومشاهد أسرع لكن كلها لا تخلو من الكوميديا والحماسة.
فيلم Tag مش أحسن فيلم كوميدي في السينمات. لكنه فيلم جيد ويستحق المشاهدة خاصة لو كنتم من محبي الأفلام الكوميدية المعتمدة على فكرة تجمعات الأصدقاء والمواقف المجنونة اللي بتحصل بالتزامن معاها.
علشان تبقى عارف: النجمان (ويل فيريل) و(جاك بلاك) كانا مُرشحيّن لأداء أدوار بالفيلم.
