talk to me : هل هانرتاح لو عرفنا حقيقة كل حاجه حوالينا؟
مهما تطورنا واكتشفنا حقيقة حاجات كتير من اللي بتحصل حوالينا. هايفضل الموت هو السر الأكبر، لإننا مش بنعرف ايه اللي بيحصل بعده. ولو حد رحل عنا ومعاه أسراره. مش هانقدر نسترجعها منه. لكن فيلم Talk to Meبيستخدم الخيال علشان يقدم لنا سرد مختلف.
فيلم Talk to Me بيحكي عن ميا (قامت بالدور صوفي وايلد) اللي بتعاني نفسياً بعيد رحيل والدتها الصادم لها ولعائلتها. ونتيجة صدمتها، بتبدأ تعيش حياتها مع مجموعة من الأصدقاء في محاولة للعودة لشكل حياتها التقليدي. لكن حياتها بتنقلب رأسا على عقب لما بتشارك في تجربة، بيدفعها لها أصدقائها، بتخليها تلمس يد مسحورة، واليد دي لها القدرة على استدعاء الموتى من العالم الأخر. الأمر اللي بيضعها في تجربة مخيفة بتحاول تخرج منها بأي شكل.
كان لنا فترة طويلة بنعاني من أن الأفلام المرعبة كلها أًصبحت شبه بعضها بشكل كبير، لكن الموضوع في Talk to Me مختلف شوية. لأننا المرة دي مش بنشوف رعب قائم على المشاهد المفاجئة أو الـ Jump scares زي ما احنا متعودين. لكن المرة دي بنشوف كمان رعب نفسي، قائم على سؤال المشاهد لنفسه: لو انا مكان ميا كنت هعمل ايه؟
الأداء التمثيلي في الفيلم ممتاز خاصة أن فيه رسالة ضمنية من الأحداث موجهة للمراهقين بالأساس، بتوريهم فيها مغبة الانسياق وراء الصحاب وايه المصايب اللي ممكن تحصل نتيجة تجربة حاجات خطيرة. ممكن نشيل اليد المسحورة ببساطة ونستبدلها بالكحول أو المخدرات مثلا.
مخرجين الفيلم مايكل وداني فيليبو هم بالأساس صناع محتوى على يوتيوب، وأخدوا فرصتهم لصناعة الأفلام مع Talk to me بالتالي نقدر نقول براحتنا انهم قدموا جديد وان كان لهم وجهة نظر مختلفة في الفيلم، جعلته من افضل أفلام الرعب اللي شوفناها مؤخرا.
لكن من ناحية تانيه ضايقتنا الإضاءة القليلة في كثير من المشاهد. وحسينا أن الإضاءة القليلة معمولة مخصوص لتمرير الخدع السينمائية وتسهيلها على المخرجين. ولو خيرونا بين اضاءة عادية وبين خدع سينمائية كتير، كنا هانختار الإضاءة على حساب الخدع، لإنها فعلا أثرت على تجربة مشاهدتنا بشكل كبير وإن كانت حركة الكاميرا وزوايا التصوير كانت مختلفة وجيدة وتستحق الاشادة
الخلاصة: فيلم Talk to me فيلم رعب مختلف عن باقي سياقات أفلام الرعب، بيقدم أداء تمثيلي يُحترم وحركة كاميرا تحترم. لكن كان هايكون أفضل لو كانت الإضاءة أحسن.
