Ted2 : جزء ثاني سىء لفيلم جيد!
لأننا اصبحنا عارفين ان بنسبة كبيرة الأجزاء الثانية من الافلام بتفسدنا وتقلل من فرحتنا بيها، لانها بتكون مجرد استغلال لنجاح الأجزاء الأولى.. بالتالى كانت مشاهدتنا للجزء الثاني من فيلم Ted من المنطلق ده، لكن على الرغم من توقعاتنا السلبية لم نكن نتوقع ان الفيلم يكون محبط بالشكل ده!
من تأليف وأخراج سيث ماكفرلين بنشوف الجزء الثاني من الفيلم الكوميدي اللى حقق نجاح منقطع النظير قبل كده. واللى كان الجزء الاول منه بيحكي عن قصة الدب المعجزة Ted واللى دبت فيه الروح بعد امنية صاحبة (مارك والبرج) .. الامر اللى جعله محط انظار الولايات المتحدة كلها…
الفيلم بيبدأ من نهاية الجزء الأول لكن لو المشاهد لم يشاهد الجزء الاول هايقدر يفهم الاحداث بشكل جيد، بنشوف فى الجزء الثاني تيد لما بيتجوز فتاة احلامه اماندا سيفريد واللى كانت بتشتغل معاه فى نفس المكان فى الجزء الاول…
الحياه الزوجية بين تيد واماندا مش بتمشى بشكل كويس، وبتظهر بينهم كتير من المشاكل بسبب الفراع وعدم وجود طفل فى حياتهم –لاسباب جنسية واضحة من تكوين الدب (تيد)- بيقرر الزوجين تبنى طفل. ومن هنا بتبدأ العقدة الحقيقية للاحداث..
تيد غير معترف به كانسان، بالتالى بيبدأ فى خوض صراع قضائى علشان يثبت انه انسان مش (ملكية) لشخص اخر.. الامر اللى بيقوده لسلسلة من المواقف المفروض انها كوميدية، لكن للاسف معظمها كان مبتذل وضعيف ومش بنفس قوة الجزء الاول على الاطلاق!
مارك والبرج فى اول مرة بيقوم فيها ببطولة جزء ثاني من احد افلامه فى اداء تمثيلي باهت ضعيف ومكرر، بينما الاداء الصوتي لشخصية تيد واللى قام بيها سيث ماكفرلين كانت قوية وواثقة وقدر من خلال تعبيرات صوته انه يقدم لنا تعبيرات حقيقية لشخصية تيد.
الموسيقي التصويرية كان الغالب عليها بعض الاغاني مع تواجد باهت للموسيقي العادية لكن بشكل اجمالى نقدر نقول ان مستوي الموسيقى كان من متوسط الى مقبول.
الجرافيكس والخدع السينمائية تم استخدامها بكثرة فى الفيلم مع الاهتمام بعدم ظهورها للمشاهد الا بعد تدقيق وده بحد ذاته نجاح لفريق الخدع فى الفيلم اللى قدر يقدم شخصية تيد على الشاشة بشكل حقيقي ومؤثر.
لو اتفرجتوا على Ted2 ننصحكم تتفرجوا عليه بشكل منفصل عن الجزء الاول.. ماتتوقعوش نفس الكوميديا المميته الى كانت فى الجزء الاول.
