Teefa In Trouble : كوميديا وأكشن من إنتاج باكستاني في سينمات القاهرة

من أجمل المميزات في الأفلام الهندية هي أنها بتقدم توليفة من الأستعراض والمغامرة والأكشن – وأحيانا الرعب- في نفس الفيلم. وواضح أن الأفلام الباكستانية هي  كمان بتمشي في نفس الإتجاه. لكن هل قدر Teefa In Trouble يقدم توليفة جيدة؟

الإجابة هي نعم ولا في نفس الوقت. نعم لأن الفيلم قدر يجمع بين أكتر من تيمة. ما بين الأكشن والمغامرة وطبعا الكوميديا وأكيد كتير من الاستعراض والأغاني. لكن في نفس الوقت كان في بعض المبالغات والمشاكل في السيناريو وتوظيف المشاهد المختلفة في أماكنها الصحيحة. علشان كده حسينا أن الفيلم كان محتاج يتم معالجته بشكل أفضل من كده علشان يخرج بصورة متميزة.

Teefa In Trouble بيحكي عن (تيفا) اللي بيتورط في مجموعة من المواقف مع رجال في غاية الخطورة، الأمر اللي بيخليه طوال الوقت يخرج من موقف ويدخل في التاني. بحيث لا يشعر المشاهدين بالزهق

المخرج أحسن رحيم وعلى الرغم من أن الفيلم هو تجربته الإخراجية الأولى إلا أنه قدر يقدم فيلم جيد ومتوازن وغير ممل. أما على زافار ومايا علي و ومحمود أسلم و جاويد شيخ أبطال الفيلم فا قدروا يقدموا أداء تمثيلي جيد جدا. وكان من الواضح أن كل واحد منهم كان عاوز يبذل أقصى قدرة عنده علشان يقدم أفضل أداء تمثيلي.

إخراج مشاهد الحركة كان فيه بعض المبالغة. لكن الموسيقى التصويرية والأغاني قدرت تنسينا أي مبالغة في الأداء. لأنها كانت جميلة ومبهجة الى اقصى درجة.

Teefa In Trouble فيلم جيد ننصح بمشاهدته لمحبي كوكتيل المغامرة والأكشن والأغاني والاستعراضات اللي بتبقى موجودة في الأفلام الهندية باستمرار.