Teen Spirit : ممكن تعمل ايه علشان توصل لحلمك؟
أفلام كتير بتحكي عن قصص صعود نجوم في عالم الغناء والتمثيل. Teen Spirit واحد من الأفلام دي لكنه في نفس الوقت قدر يكون لنفسه شخصيته المستقلة عن باقي الأفلام اللي بتحكي عن كواليس الحياة والعمل في عالم صناعة الموسيقى في الولايات المتحدة
Teen Spirit بيحكي عن فيوليت – بتقوم بالدور ايلي فانينج- اللي بتحاول تنجح في مسابقة للأستعراض والغناء علشان تقدر تهرب من حياتها الرتيبة والمملة. لكن رحلة النجاح في عالم الموسيقى مش بس هاتختبر قدراتها الغنائية. لكن كمان قدراتها الأخلاقية والإنسانية في نفس الوقت.
من أحلى الحاجات في الفيلم الموسيقى والاستعراض. واللي لقينا جسمنا بيتحرك معاها بدون ما نشعر. ولو كانت الأغاني والموسيقى ضعيفة كان الفيلم بالكامل هايكون بلا معني لانه في الأساس بيحكي عن قصة شخص عايش في مجال الموسيقى.
لكن الأداء التمثيلي نفسه مكانش بالقوة دي. وكان المخرج والمؤلف ماكس مينجلا عاوز يقول لنا : انا قدمت لكم موسيقى واستعراض واغاني كويسين.. عاوزين ايه اكتر من كده! ومعنى كده ان التمثيل مكانش في اضعف حالاته لكن ممكن نقول انه كان من اضعف حلقات الفيلم
لو كنت من محبي أفلام قصص الكفاح والصعود، أو لو من محبي الأفلام اللي بيغلب عليها الطابع الفني والاستعراضي. بالتأكيد Teen Spirit هايكون محطة تستحق التوقف عندها
