The 5th wave : نحتايه سينمائية غير موفقه
الأفلام اللى بتتكلم عن نهاية العالم، والمأساة اللى بيعيشها الناس اللى بيحطهم حظهم الوحش فى مواجهة غزو فضائى او سلسلة من الكوارث الطبيعية، نوعية الأفلام دي بتعجبنا وبنحب نتابعها باستمرار، ومعانا نسبه كبيره من محبى الافلام بشكل عام، يمكن علشان النوعية دي من الأفلم بتعطينا امل فى المستقبل او احساس ان الاوضاع الحالية مهما كانت سيئة ممكن تبقى أفضل من اوضاع ناس تانيه.
من اخراج جا بلاكيسون وبطولة كلوي جريس موريتز و ليف شرايبر و ماريا بيلو و رون ليفينجستون بنشوف قصة عائلة مكونة من اب وبنته واخوها الصغير، واللى بيشهدوا مجموعة من الأحداث الصعبة والمميته نتيجة ظهور جسم غامض على سطح الغلاف الجوي لكوكب الأرض، ونزول كائنات فضائية منه هدفها ابادة البشر.
بداية من المشاهد الافتتاحية للفيلم، وخصوصا مشاهد الطبق الطائر الخاص بالـ(أخرين) اللى بيتكلم عنهم الفيلم، واحنا افتكرنا على الفور فيلم Independence Day واللى تم انتاجه فى التسعينات واللى بيتكلم عن غزو فضائى بيستهدف ابادة البشر.. برضو!
الغريب ان فيلم The 5 th wave تقريباً محاولش يقدم اي جديد عن فيلم التسعينات.. بداية من مشاهد الدمار الكبير ونهاية بفكرة البطل الواحد اللى بيعمل كل حاجه بنفسه علشان ينقذ العالم.. طبعا المؤثرات الخاصة كان لها دور كبير فى الفيلم وكان المفروض تكون نقطه راجحه فى كفته، لكنها للاسف كانت ضعيفه وركيكه وهزلية وكان واضح جدا مدي الاستسهال فى صناعتها وتقديمها للمشاهد النهائى.
الأداء التمثيلي كان قوي ومؤثر.. كلوي جريس قدرت تقدم لنا احساس الفتاة الضائعة واللى بيتغير مستقبلها وحياتها بالكامل مع بداية الغزو الفضائى ، وساعدها على ده المونتاج والسيناريو اللى ضوعوها فى مشهد افتتاحي فى بداية الفيلم يجعلنا فى حالة ترقب شديدة لباقى الاحداث اللى ها نشوفها بعد كده.
The 5 th wave يصلح كفيلم فى نهاية الاسبوع.. للتسلية والمتعة مع بعض المؤثرات الخاصة والتقنية، لكنه مش فيلم قوي او مؤثر فى الذاكره على المدي الطويل.. للأسف.
