The 9 th life of louis darx : البشر زي القطط.. لهم 9 أرواح!
المثل الإنجليزي بيقول إن للقطط 9 أرواح… وواضح إن المثل ده وصل مصر فى فترة Sale أو حاجه، لإن المثل المصري بيقول أن للقط 7 أرواح فقط… على أي حال كنا محتاجين يكون عندنا صبر 9 أشخاص فعلاً علشان نفك ألغاز فيلم The 9 th life of louis darx
الفيلم بيبدأ بمشاهد افتتاحية للطفل لويس اللى بيجسد شخصيته آيدن لونجوورث اللى بيحكي عن تعرضه لعدد كبير من الحوادث لما كان صغير، بداية من الصعق بالكهرباء وحتي كل أنواع الحوادث اللى ممكن نتخيلها، لحد ما بيحصل له حادث بينهي كل الحوادث اللى مر بيها قبل كده –على حد تعبيره- وهو الوقوع من على قمة مرتفع عالي لبحيرة عميقة.
بعد كده بياخدنا الفيلم لرحلة الطب النفسي داخل نفسية الطفل لويس علشان يعرفوا قصته بالظبط، ومن خلال حكايته بنبدأ نكمل باقي أحداث الفيلم اللى مش عاوزين نحرقها عليكم علشان تعرفوا تشاهدوا الفيلم.
بالنسبة للأداء التمثيلي تميز أرون بول فى دور الاب، وأرون سبق من قبل وشاهدناه لفترة طويلة زمنياً وهو بيأدي دور (جيسي) تاجر المخدرات المبتدىء اللى بيكبر مع الوقت وبيتزعم تجارة مربحة جداً فى مسلسل Breaking Bad بأجزاؤه، لكن للأسف أداء أرون فى فيلم اليوم كان أضعف بكتير من مشاركته فى المسلسل، لكن لازم نقول أن حجم الفيلم ودوره فيه ممكن يكونوا لم يساعدوه فى تقديم كل ما عنده من قدرات تمثيلية.
الطفل آيدن لونجوورث قدم أداء تمثيلي متميز بيوعد بمستقبل فني مبهر، وأكيد هايكون له مستقبل متميز فى هوليود بعد الأداء التمثيلي الرائع اللى شوفناه له فى فيلم اليوم، ويكفي أنه كان قادر على تحمل دور البطولة بدون ما يفقد الإحساس بالشخصية اللى بيأديها.
الديكور والموسيقي التصويرية كان لهم دور مهم فى الأحداث، وقدروا ينقلونا بصرياً وسمعياً للمنطقة اللى بيناقشها الفيلم، كمان المؤثرات الخاصة وحركة الكاميرا لعبت دور متميز فى تصوير المشاهد اللى فيها خدع بشكل رائع وجديد على أعيننا.
ماينفعش تتفرجوا على The 9 th life of louis darx كفيلم مسلي فى الويك إند، لازم تعطوه حقه من التركيز والإهتمام بالتفاصيل علشان تستمتعوا بالفيلم اللى بنرشحه للمشاهدة بالنسبة للمشاهدين اللى عاوزين يركزوا فى الأفلام اللى بيشوفوها.
