The Accountant : هل فعلا فيلم ممتع ومشوق؟!

أسابيع طويلة كنا بنشاهد فيها بوستر فيلم The Accountant فى السينمات… وبدأنا فى نسج سيناريوهات وقصص مختلفة عن الفيلم.. ثم بدأت إعلانات الفيلم فى النزول للسينمات فشعرنا برغبة أكبر فى مشاهدة الفيلم ومعرفة أحداثه… ثم شاهدنا الفيلم نفسه بعد طول انتظار… وياريتنا ما شوفناه!

The Accountant من إخراج جافن اوكونور وتأليف بيل دوبوكيو وبطولة بن أفليك و أنا كندريك و  جيفري تامبور، وبيحكي عن قصة طفل صغير بيصاب بمرض نفسى فى الصغر، وبيتكفل والده العسكري السابق فى أمريكا بعلاجه، الأمر اللى بيكسبه موهبة غير عادية بخصوص الأرقام والحسابات.

كريستيان بطل الفيلم بيبدأ فى استغلال قدراته المتميزة فى الحسابات للعمل لصالح ناس من أكبر العصابات فى العالم، وبيبدأ فى معرفة أسرار كتير عن عوالم الأعمال غير المشروعة على مستوي العالم كله.. ثم بتتوالى الأحداث اللى مش عاوزين نحرقها عليكم أكتر من كده.

على الرغم من القصة المشوقة وفريق العمل المتميز، إلأ أن النتيجة النهائية على الشاشة كانت محبطة جدا، لإننا شعرنا بحالة كبيرة من الملل نتيجة بطء الأحداث وبُخل صناع السيناريو فى الكشف عن أوراقهم لدرجة أشعرتنا بالإحباط وعدم الرغبة فى متابعة المشاهدة… الحالة دي أصابتنا بنوع من خيبة الأمل فى فيلم انتظرناه لوقت طويل جدا.

الأداء التمثيلي لبن أفليك كان مش بيقدم غير انطباع واحد على وجهه طوال الوقت.. إحنا فاهمين إن ده جزء من سرد قصة الفيلم ومحاولة منه لتقمص الشخصية، لكن كان محتاج مجهود تمثيلي أقوي من كده علشان يقدر يقنعنا كمشاهدين بدوره، أيضا إخراج مشاهد الأكشن لم يكن بالقوة اللى كنا نتوقعها أو نرغب فيها.. بعض الأراء النقدية كانت بتقارن بين The Accountant و John wick وعلى الرغم من انتماء الفيلمين لنفس العالم تقريبا، لكن جون ويك ينتصر بلمس الأكتاف ومن المشهد الأول!

الموسيقي التصويرية والديكور، على الرغم من محاولة الإخراج إنه يخلينا نشوفهم بشكل متميز إلا إن مستواهم كان متوسط ومأثروش فينا على الإطلاق.. والفيلم بأكمله فى المنطقة المتوسطة بين تقديم عمل متميز جدا، وبين تقديم عمل ساقط وهابط.

The Accountant مثال قوي للأفلام اللى التريلر بتاعها ممكن يخلى الناس تقبل على مشاهدته ثم يكتشفوا إنه مش بالقوة اللى كانوا متوقعينها… إنتوا إيه رأيكم؟!