The Addams Family : الملل غلب رسالة الفيلم
من الجميل أننا نشوف فيلم أنيميشن قائم ومعتمد على فكرة قديمة تم تقديمها قبل كده. الأحلى لو الفيلم اللي بنشوفه بيقدم كمان رسالة للكبار والصغار على حد سواء. The Addams Family حقق الهدفين دول.. لكن فشل في أهم هدف… أنه يسلي المشاهدين!
The Addams Family بيحكي عن عائلة أدمز اللي بيعيشوا في عزلة نتيجة طباعهم الغريبة وعدم تقبل الناس لهم. الفيلم مقتبس عن عمل تم تقديمه في الستينات وتمت إعادة تقديمه في أكثر من فيلم بعد كده.
الجميل في الفيلم هو الرسالة اللي بيقدمها واللي بيشجع فيها الفيلم على تغيير النظرة للاخر وتقبله باختلافاته بدون محاولة التقليل أو التغيير منه.
من أجمل الحاجات كمان في الفيلم هي دقة رسم الشخصيات والاهتمام بتفاصيلها الصغيرة وطريقة تحريكها على الشاشة. لكن صناع The Addams Family نسيوا أهم حاجه المفروض تكون موجوده في فيلم… عنصر التسلية!
الفيلم بيبدأ بافتتاحية مقبولة الى حد ما من حيث التشويق. ثم بيبدأ الرتم في الهبوط لحد منتصف الفيلم تقريبا. في الفترة دي مشاهدين كتير ممكن يسيبوا السينما من فرط شعورهم بالملل!
وعلى الرغم من تضمين شوية مواقف وايفيهات كوميدية. بالإضافة للطريقة الباردة – والكوميدية في نفس الوقت- اللي أدت بيها تشارلز ثيرون الأداء الصوتي لشخصية موريتشيا آدامز وباقي ابطال الفيلم زي كلوي جريس موريتز و فين وولفارد وغيرهم. لكن مع الأداء الصوتي الجيد والكوميديا برضو فشل السيناريو في تقديم أحداث ومواقف مستمرة ومتصاعدة من حيث الكوميديا. وفي النهاية حسينا بأكبر قدر ممكن من الملل!
The Addams Family فيلم بيحاول يثير جوانا شعور بالنوستالجيا مع شوية رسائل مستترة وبعض الكوميديا. لو بتحبوا الخليط ده بالتأكيد هايعجبكم الفيلم لو تغاضيتم عن السيناريو (الواقع) من حيث الرتم.
