The Angry Birds Movie 2 : الطيور والخنازير.. ايد واحده!

من أيام ما كانت The Angry Birds لعبة على الموبايل، وأحنا عارفين أن الطيور بتحارب طول الوقت ضد الخنازير. لكن اللي بيقدمه The Angry Birds Movie 2 هو قصة تعاون بين الأعداء لمواجهة خطر أكبر وأهم.

على الرغم من أن قصة The Angry Birds Movie 2 جيدة وممكن يخرج منها كوميديا قوية جدا، إلا أن مؤلف الفيلم بيتر اكرمان ماقدرش يقدم لنا كل الكوميديا الممكنة في القصة، وأخد الطريق السهل علشان يقدم لنا مجموعة من الايفيهات والتلاعب بالكلمات واللي حسينا انه مش جديد وقابل للتوقع.

لكن لو هانتكلم عن إيجابيات الفيلم. عجبنا جدا التحريك ورسم الشخصيات وكرنفال الألوان اللي كان موجود في كل مشهد. التفاصيل دي بتفرق مع الأطفال الصغيرة وتخلي متابعتهم للفيلم أسهل وأمتع. كمان الموسيقى الخاصة بالفيلم كانت حماسية وجميلة وجددت عندنا شعور بالنوستالجيا للزمن الجميل.

كل شخصية من شخصيات الطيور كانت متوافقة مع الصوت اللي بيأديها وماحسيناش بغربة ناحية الشخصيات دي. لكن بشكل عام حسينا ان الفيلم اضعف من الجزء السابق مع انه المفروض يكون بيقدم تجربة مضمونة النجاح اعتمادا على ارتباط الجمهور بشخصيات وأحداث الجزء الأول.

فيلم The Angry Birds Movie 2 فيلم مناسب للأطفال الأصغر سنا بشكل كبير علشان الألوان وتنوعها على الشاشة. كان ممكن يكون مناسب لكل الاعمار لو كان ركز على القصة واستغلالها بشكل أفضل من اللي شوفناه في النهاية.