The Art of Racing in the Rain : هاتعيط وتضحك في نفس الفيلم!
طول عمرها الكلاب مصدر بهجة وسعادة لبني البشر. لكن واضح أن صناع فيلم The Art of Racing in the Rain قرروا يضعوا كل الحبكات المأساوية علشان يقدموا لنا في النهاية فيلم يخلينا نبكي بكل الطرق الممكنة! لكن – وده الغريب – أن بعض المشاهد هاتخلينا نضحك برضو!
The Art of Racing in the Rain بيحكي عن الكلب إنزو، واللي بيجسد صوته كيفن كوستنر. والمواقف اللي بتقابله في حياته وحياة صاحبه داني (قام بالدور ميلو فينتميليا) واللي بيشتغل في عالم سباق السيارات.
مش مبرر أن الفيلم اللي بيحكي عن عالم السباقات والسرعة، يدخلنا في تفاصيل شخصيات أبطاله بنفس السرعة دي. يمكن ده اللي خلانا لا نشعر بالتعاطف سوى مع الكلب أنزو اللي تم بناء شخصيته بشكل متمهل ومن البداية للنهاية، خاصة مع الأداء الصوتي لكيفن كوستنر اللي قدر يقدم أداء صوتي متميز للشخصية. ودي حاجه مش سهله ابدا خاصة لو كانت شخصية كلب.
ممكن نقسم الفيلم لفصول مربوطة مع بعضها بخيط صغير من الأحداث المشتركة. وأختار المؤلف مارك بومباك أن الرابط ده يكون هو نفسه الكلب انزو. علشان كده نقدر نعتبره البطل الحقيقي للأحداث والمحرك الأساسي لحبكة الفيلم من البداية للنهاية.
عجبنا في الفيلم الأهتمام بديكورات التصوير والموسيقى التصويرية اللي تم توظيفها في الأحداث بشكل جيد وملهم جدا. بحيث تتصاعد في مشاهد الحركة وتقل – أو حتى تختفي خالص- في المشاهد اللي محتاجه تركيز أكتر من المشاهدين.
The Art of Racing in the Rain فيلم هاينجح انه يخليك تبكي وتضحك في نفس الوقت. ولو كنت من محبي الكلاب. متعتك هاتزيد لو قدرت تتناسى ضرورة شعورك بالتوحد مع الشخصيات.
