The Beguiled: اتق شر الحليم اذا غضب!
في أوائل التسعينات استقبلت السينمات المصرية فيلم الراعي والنساء، ومن قبله شوفنا فيلم رغبة متوحشة لنادية الجندي ومحمود حميدة، والفيلمين كانوا بيناقشوا نفس القصة اللي بيناقشها فيلم The Beguiled مع بعض التحريف طبعا. من الواضح أن ممكن رواية أو فكرة واحدة تلهم مجموعة فنانين ومخرجين حول العالم بتناولها في أعمالهم.
القصة
The Beguiled بيحكي عن فترة الحرب الأهلية الأمريكية، لما بيعثر مجموعة من السيدات والبنات على جندي تابع للجيش الاتحادي الأمريكي، وبيتم إسعافه من اصابته، ثم بيبدأ يرتبط بقصص عاطفية مع معظم الموجودين في المكان، لحد ما بيوصلوا لمرحلة التأمر ضده. لكن هل هاينجحوا في تحقيق هدفهم؟ هو ده اللي هانتابعه من خلال أحداث الفيلم.
فريق العمل
الفيلم من اخراج وتأليف صوفيا كوبولا اقتباسا عن رواية توماس كولينان ومن بطولة كولن فاريل و نيكول كيدمان و كريستين دانست و إيلي فانينج
الأداء التمثيلي
لما نتكلم عن ممثلين بحجم نيكول كيدمان كولن فاريل، فا احنا بنتكلم عن أداء تمثيلي متميز وقدرة غير عادية على توصيل المشاعر باقل قدر من الكلام، وبالاعتماد الأساسي على نظرات العيون ولغة الجسد وغيرها من أدوات التمثيل، وده اللي جعل الأداء التمثيلي لكل الابطال تقريبا متميز ويستحق الإشادة.
السيناريو والحوار والأخراج
اخراج الفيلم قدر يعتمد على القدرات التمثيلية لابطاله بشكل كبير، وقدر يوظف ادوارهم بشكل رائع باستخدام السيناريو اللي بنعيب عليه انه كان ممل وكنا محتاجين نشعر ان وتيرة الاحداث اسرع من كده بشكل كبير، لكن ضعف السيناريو عوضه الحوار القوي والمعبر في كل جوانبه واللي فهمنا كتير من دوافع الشخصيات اللي بنشوفها.
الديكورات والموسيقى والأزياء
ديكورات الفيلم قدرت ترجعنا لعصر الحرب الاهلية الأمريكية على الرغم ان مافيش حد فينا عاشها في الواقع، لكن الصور والرسومات اللي شوفناها عن الفترة دي كانت بتعبر عن نمط الحياة والملابس، وكل ده شوفناه في الفيلم من خلال اهتمام كبير بالتفاصيل ورغبة اكيدة في تقديم عمل قوي لكن ممل شويه، علشان كده بننصح المشاهدين يكون عندهم شوية صبر وطولة بال اثناء مشاهدة الفيلم.
الخلاصة
The Beguiled فيلم مناسب للبنات والسيدات والناس اللي بتحب تتفرج على الأفلام اللي بتحمل وجهة النظر النسوية أو المناصرة للأنثى بشكل عام.
علشان تبقى عارف:
بحصول مخرجة الفيلم على لقب أفضل اخراج عن الفيلم أصبحت أول سيدة تحصل على اللقب في تاريخ مهرجان كان.
