The Big Short : الأقتصاد يهزم السينما!
على الرغم من معرفتنا المسبقة ان فهم الفيلم ممكن يكون صعب على الناس اللى ما درستش المحاسبة أو الاقتصاد، لكن احنا مالنا بالكلام ده؟! محرر كايرو360 بالفعل كان بيدرس الأقتصاد والمحاسبة زمان.. لكن لما بدأ عرض الفيلم حسينا اننا مش فاهمين اي حاجه.. فما بالك بالناس اللى مالهاش فى المجال اصلا؟!
من أخراج ادم مكاي فى اول عمل درامي بيقوم باخراجه بنشوف براد بيت و سيلينا جوميز و ميليسا ليو و ستيف كاريل فى قصة بتدور زمنياً قبل الأنهيار الأقتصادي الضخم والكساد اللى تعرضت له الولايات المتحدة الأمريكية مؤخراً واللى كان السبب فيه قروض الرهن العقاري والأستثمار على المدي الـ…. الحقيقة احنا كمان مش عاوزين نخوض فى تفاصيل اقتصادية ومحاسبيه مبالغ فيها.. لكن نقدر نشرح الموضوع ببساطه.
امريكا ماشيه بنظام القروض العقارية.. اي شخص يقدر يروح يسكن فى اي فيلا فخمه يحبها.. وفى المقابل يدفع ثمن المكان ده بالتقسيط المريح للبنوك.. معظم الناس مش بتقدر توفى باقساط الدين العقاري فى وقتها، وبتبدأ فى دفع غرامات تأخير على القروض العقارية، كل ده علشان يقدروا يحتفظوا بمنازلهم، وده بيعمل ثروة للبنوك اللى بتقدم القروض دي… الأزمة المالية الأمريكية حصلت لما فوائد القروض دي وصلت لمرحلة من التضخم عجز عنها الناس تماما عن السداد!
الفيلم بيحكي عن مجموعة من دارسي الأقتصاد، واللى راهنوا على اوضاع السوق وقرروا انهم يستثمروا مبالغ ضخمة جدا كنوع من الرهان ان القروض العقارية مش هايتم سدادها.. ايامها كانت القروض العقاريه قوية جدا ومستقره فى السوق، الامر اللى جعل اصحاب المؤسسات المالية يبصوا لأبطالنا على انهم جهلاء او مجانين.. لكن العكس كان هو الصح!
بعيدا عن القصة اللى زي ما قولنا ممكن تكون صعبة على الفهم، السيناريو كان قوي ومتماسك وقدر يعرض لنا القصص المختلفه بتوازي كويس، مع التركيز طبعا على بعض الشخصيات على حساب بعض الشخصيات او الخطوط التانيه، وده شىء مفهوم وكان لازم يحصل خصوصا واحنا بنتكلم عن عمل فيه اكتر من خيط وبيتشابكوا مع بعض بشكل او باخر.
مشكلتنا الوحيده مع السيناريو –وهى مشكله كبيره- هى انه شوقنا طوال احداث الفيلم بلحظة الصدمة مع حدوث انهيار السوق، لكن اللى شوفناه ساعتها ما توازاش مع كم التشويق اللى فضلنا عايشين فيه فى النصف الأول من أحداث الفيلم.
الموسيقي التصويرية لم تكن بالقوة اللى كنا متوقعينها، اما الديكورات فكانت قويه ومتميزه ونقلتنا لمرحلة الماضى القريب فى الولايات المتحده، لان الحادث اللى بيتناوله الفيلم حصل فى زمن قريب مش بعيد.
The Big Short مش هايعجب المشاهدين اللى ماعندهمش اي اهتمام بالأقتصاد ، وممكن مايفهمهوش خالص.. علشان كده ننصحكم بعدم مشاهدة الفيلم الا لو كان عندكم ميول اقتصاديه ومحاسبيه قويه.
