The Big Trip : المتعة في الرحلة مش في الوصول للهدف
المتعة الحقيقية مش في الوصول للهدف. لكن في الطريق اللي مشيت فيه والرحلة اللي قطعتها علشان توصل للهدف. هو ده اللي فيلم The Big Trip بيعلمه لنا. لكن هل نجح فعلا يوصل لنا هدفه؟
The Big Trip بيحكي عن باندا طفل. بيوصل لعائلة من الدببة عن طريق الخطأ. الأمر اللي بيخليهم يخوضوا رحلة طويلة ومتعبة – وممتعة في نفس الوقت – علشان يرجعوه تاني لمكانه الصحيح.
على الرغم من قوة القصة لكن اخراج ناتاليا نيلوفا و فاسيلي روفينسكي مكانش بنفس قوة القصة. يمكن بسبب ميزانية الفيلم القليلة واللي أثرت على عامل الابهار وقوة رسوميات الفيلم واستخدام المؤثرات الخاصة. بالتالي حسينا أن الشخصيات على الشاشة كانت محتاجه تكون أكتر حيوية وسرعة في الحركة.
مستوى الكوميديا في الفيلم مقبول. لكن في نفس الوقت مش هايعلق في ذاكرتنا شخصية معينة أو (ايفيه) معين بيتقال أو حتى موقف كوميدي حسينا أننا هانقع على الأرض من كتر الضحك فيه. الكوميديا في الفيلم ماشية على وتيرة ثابتة بدون زيادة او نقصان زي ما تكون مظبوطة بالمسطرة ودي حاجه من الحاجات اللي ماعجبتناش في الفيلم.
لكن الفيلم بيقدم رسالة جيدة للمشاهدين سواء الكبار أو الصغار. أن أحيانا بتكون الفايدة والمتعة في رحلة الحياة نفسها مش في الهدف النهائي اللي بنسعى نوصل له. هل كان لازم نستحمل سلبيات الفيلم علشان نوصل للرسالة دي؟
The Big Trip فيلم أنيميشن هايعجب الأطفال صغار السن لكن ممكن يكون ممل شويه للفئات الأكبر سنا من المشاهدين
