The Body : شوفتك فين قبل كده؟!
فكرة تقديم إعادة إنتاج أو Remake لفيلم صدر من عدة سنوات، دي حاجة عادية وبتحصل طول الوقت تقريبا. وممكن نقول أن هوليود نفسها بتعمل كده لكل الأفلام اللي قدمتها في السنوات اللي فاتت.
لكن الغريب أنك تعمل إعادة اصدار لفيلم تشويق واثارة، وتستخدم نفس الحبكة ونفس الحل! أي حد شاف الفيلم اللي أنتج سنة ٢٠١٢ هايبقى عارف كل حاجه هاتحصل في نسخة ٢٠١٩!
The Body بيحكي عن سيدة أعمال بتتقتل في ظروف غامضة ثم بتختفي جثتها. ومع البحث عن الجثة بتبدأ سلسلة طويلة من الأحداث الغامضة والمثيرة في التداعي.
كان ممكن نتغاضى عن الحبكة المحروقة لفيلم The Body لو كان تنفيذ الفيلم على الشاشة أفضل. لكن أسلوب التصوير نفسه كان واضح فيه جدا (الاسترخاص) من ناحية الإنتاج. وحسينا أن الصورة السينمائية اللي شوفناها تستحق تكون خاصة بمسلسل مش بفيلم.
الأداء التمثيلي لأبطال الفيلم كان جيد. لكن يعمل ايه الأداء التمثيلي الجيد لو هايتحط مع ميزانية ضعيفة وتنفيذ ردئ وحبكة محفوظة ومكررة في فيلم سابق؟!
The Body في رأينا يستحق المشاهدة على التليفزيون أكثر من المشاهدة في السينما. ولو شوفتوا نسخة ٢٠١٢ يبقى مش هاتشوفوا أي جديد في النسخة الحالية.
