The Boy And The Beast: أنيميشن متواضع بقصه جيده
على الرغم من إن المستوي الفني للفيلم مكانش قوي إلا إن فكرة إننا بنشوف أنيميشن ياباني بعيدا عن هيمنة هوليود خلتنا متفائلين بالتجربة، على الرغم من عدم الإقبال الجماهيري، والسينما اللى شغلت لنا الفيلم لوحدنا تماماً على الرغم من إن الفيلم بيتعرض فى بعض الحفلات فقط!
من تأليف وإخراج مامورو هوسودا بنشوف قصة المراهق اليتيم كيوتا، واللى بيهرب لشوارع اليابان بعد وفاة والدته، فقط علشان يتعرض للإختطاف على يد بعض الوحوش، واللى بيكتشف من خلالهم ان العالم منقسم مابين عالم الوحوش وعالم البشر، وإن الفرق بين العالمين هش جدا وضعيف، ومن هنا بتاخدنا أحداث الفيلم لحياة كيوتا وهو بيحاول يكون تلميذ مطيع لأحد الوحوش اللى بيتصفوا بسوء الأخلاق.
زي ما قولنا قصة الفيلم جيده، وكان ممكن يتم إخراج فيلم أفضل من اللى شوفناه على الشاشة من الناحية الفنية، لكن واضح إن التقنية الأساسية لصناعة أفلام الأنيميشن فى اليابان مختلفة عن التقنية اللى بتتبعها هوليود باستوديوهاتها العملاقة ومكاتبها اللى مسيطرة على صناعة الأنيمي فى العالم.
على مستوي التحريك مثلا الفيلم كان سىء جدا، وكان عندنا شعور طوال الوقت إن الفيلم مش كويس من ناحية التحريك، والطريقة اللى كانت الشخصيات بتتحرك فيها على الشاشة مكانش فيها اي نوع من الإنسيابية أو الليونه، لكن الموسيقي التصويرية والمقتبسة من المجتمع الياباني كانت كويسه ومتميزة وجميلة وقدمت لنا تجربة سمعيه كويسه كان نفسنا انها تستمر.
على الرغم من ضعف إنتاج الفيلم إلا ان القصة قوية وفيها أكتر من Twist، والملل ما دخلش نفوسنا أبداً لان القصة كانت قادره تشدنا من البداية للنهاية بشكل متسارع ومتتالى بدون ملل أو إحساس بالرتابه، ونقدر نقول إن الفيلم لو كان تم الإهتمام بيه من الناحية الإنتاجية أكتر من كده كان ممكن يحقق نجاح كبير.
لو بتدوروا على قصة ممتعة لأولادكم ممكن تفكروا فى The Boy And The Beast، لكن لو بتدوروا على تجربة الإبهار فى المشاهدة… استنوا عمل تاني.
