The Butler: قصة كفاح لأجل الحياة

الخادم.. على الرغم من الدور الصغير الهامشى اللى بـ يلعبه، إلا أن شهادته على الأحداث اللى بـ تدور حوله، خصوصًا لما يقضى وقت طويل فى عمله، وقدرته على الوصول للعديد من المناطق السرية والمهمة فى مبنى من أهم المبانى فى العالم وهو مبنى البيت الأبيض، كل الأمور دى بـ تخلى وظيفة الخادم واحدة من أهم الوظائف اللى تستحق أنها تتحول لقصة تروى فى السينما، بل وتقدم لنا واحد من أفضل الأفلام اللى نتوقع أنها تنافس بشكل رئيسى على الأوسكار.

فورست ويتكر، الممثل الأمريكى الأسمر الشهير بـ يقدم واحد من أهم وأفضل أدواره على الإطلاق من خلال قصة سيسيل جاينز الخادم بالبيت الأبيض، واللى بـ يعاصر عدد كبير من الرؤساء الأمريكان فى فترة إعادة كتابة تاريخ أكبر وأهم دولة فى العالم، بل وإعادة كتابة خريطة العالم السياسية والجغرافية والاجتماعية بشكل أو بآخر.

ويتكر قدر يتقمص الدور بشكل أكثر من رائع، ساعده على إتقان دوره وإحساسنا بروعة الفيلم، باقى العوامل المساعدة زى الموسيقى التصويرية اللى كانت أكثر من رائعة، والديكورات واختيارات الملابس اللى لعبت دور متميز جدًا فى إدخال المشاهد لقلب الأحداث بداية من المشهد الأول ببراعة منقطعة النظير.

النجاح ينسب بالدرجة الأولى طبعًا للمخرج لي دانيالز اللى قدر يوظف كل العناصر دى علشان يخرج الفيلم بالمستوى الراقى اللى شوفناه فى الشاشة، وقدر يتحكم فى عناصر الفيلم وحتى ظهور المذيعة المتألقة المعتزلة مؤخرًا أوبرا وينفرى حتى لو كان فى دور صغير إلا أنه كان له دور كبير مؤثر على مجرى الأحداث.

The Butler واحد من أفضل أفلام الموسم، ننصحكم تدخلوه على اختلاف اهتماماتكم.. هـ يعجبكم.