The Call of the Wild : تعلموا الحكمة من.. الكلاب!
العلاقة بين البشر والكلاب هاتفضل واحدة من أقوى العلاقات اللي نشأت بين البشر وبين الكائنات الغير بشرية بشكل عام. وتم تناولها في عدد كبير من الكتب والروايات والمسلسلات والأفلام. هل هايقدر The Call of the Wild يقدم أي جديد في الصدد ده؟
The Call of the Wild بيحكي عن كلب بيعيش حياة كئيبة نوعا ما، ثم بيتعرف على رجل بيصحبه في رحلة بتغير حياة الأتنين تماما بشكل مش عاوزين نحرقه عليكم أكتر من كده.
الأداء التمثيلي لهاريسون فورد كان أكثر من رائع. والحقيقة أن فورد من الممثلين اللي قادر يجسد أي شخصية بينطلب منه. والأروع في فورد أنه بيجسد شخصياته بالتناسب مع سنه ومش بيعيش سن مش سنه. لكن كان نفسنا مساحة دوره تكون أكبر. لكن الجيد كان استخدام صوته كراوي للأحداث
مستوى الخدع السينمائية في The Call of the Wild كان أكثر من رائع وملعوب باحترافية كبيرة قوي. وده هايفتح لنا باب كبير في المستقبل لتوظيف المؤثرات الخاصة لصناعة أفلام كاملة من الألف للياء وإتاحة مستويات أكبر من الخدع للمخرجين وصناع الأفلام. لكن كل ده كان هايكون بلا معنى لو سيناريو الفيلم كان ضعيف أو مش مترابط. والحقيقة أن السيناريو كان جيد جدا ومترابط رغم أن القصة معروفة لقطاع كبير من المشاهدين.
The Call of the Wild مش أحسن فيلم عن الكلاب وعلاقتها بالبشر. لكنه فيلم قوي ويستحق المشاهدة. ويستحق أننا نتعلم الحكمة. حتى لو من علاقة الكلاب بالبشر.
