The Choice : عن الاختيارات فى حياتنا

الإسم.. النوع.. الجنسية.. تاريخ الميلاد.. بعض الحاجات مش بنقدر نختارها فى حياتنا.. لكن حاجات كتير جدا جدا جدا بنقدر نختارها، وبتحددها اختياراتنا.. وبتتبني كتير جدا من أمور حياتنا على الإختيارات اللى بناخدها، والبدائل اللى بنعتمد عليها للوصول لأهدافنا فى الحياه.. عن كل ده وأكتر بيدور فيلم The Choice فى إطار من الكوميديا مع بعض الأكشن الخفيف والكوميديا البسيطة.

من بطولة تيريزا بالمر و توم ويلكنسون و ماجي جراس وإخراج روس كاتز بنشوف قصة حبيبين بيتقابلوا صدفة من خلال علاقة جيرة.. الرجل طبيب بيطري والبنت عندها كلبه صغيرة.. بالتالى الأمور كلها مفهومة بالنسبة لنا.. والصدف اللى بتجمع الحبيبين وشوية الخناقنات اللى بتحصل فى أول العلاقة، كل الأمور دي كانت مفهومة بالنسبة لنا، ولو كان إكتفى الفيلم بالتعرض لها كان تقييمنا له هايكون أقل.. المفجأة كلها فى الفيلم بتحصل لما بيـ…. مش عاوزين نحرق عليكم الأحداث أكتر من كده.

من أجمل الحاجات اللى عجبتنا فى الفيلم.. الديكورات المتميزة واللى قدرت تنقلنا للجو العام للفيلم بدون شعور بالغربة.. لكن مشكلتنا مع الفيلم كانت شعور بالملل تسرب لنا فى منتصف  الأحداث تقريباً. صحيح السيناريو عوض الملل ده بجرعه من الأحداث السريعة جدا على الصعيد الزمني وعلى صعيد الأحداث.. إلا إننا مانقدرش ننكر شعورنا بالملل والإستغراب من التلاحق السريع للسيناريو الزمني لأحداث الفيلم.

أماكن التصوير –وخصوصا الجزيرة- كانت من اهم العوامل اللى جعلت تقييمنا للفيلم يرتفع، وكان واضح تماما الإهتمام التام بأماكن التصوير وتكنيكات الكاميرا والخدع السينمائية واللى ظهرت فى مشهد واحد تقريبا لكنه كان يستحق الإهتمام.

The Choice من نوعية الأفلام اللى كلامنا عنها ممكن يكون قليل، لان التجربة السينمائية نفسها تغني عن الكلام وتعوضه.. وبنرشح الفيلم للمشاهدة لكل محبى الافلام الرومانسية الهادئة