The Cobbler : الحياة من خلال أحذية الاخرين!
البعض بيشوف الحياة من منظور الاخرين من خلال عيونهم.. والبعض بيحس بالناس من ملمس كفوفهم عند السلام. لكن ان حد يشوف الحياه ويعيشها من منظهور الاخرين من خلال انه يرتدي احذيتهم! هو ده الجديد، وهو ده اللى بيقدمه ادم ساندلر فى فيلمه الجديد.
ساندلر من فنانين الكوميديا اللى بتجمع افلامهم بين العظة والعبرة. او الرسالة الانسانية، وبين الكوميديا بيشترك فى الفكرة دي مع كوميديان عظيم اخر هو جيم كاري ومن قبلهم روبن ويليامز. ويمكن ده اللى بيميز الافلام اللى بيقدموها وبيخليها تستحق المشاهدة.
الفيلم بيحكي عن (اسكافى) – الراجل اللى بيصلح الاحذية- هو ادم ساندلر. عايش مكتئب وغير راضى عن حياته، مع والدته العجوزه بعد ان هجرهم والده فى ظروف غامضة واتخلى عنهم. الامور بتختلف تماما لما بيكتشف ساندلر ان له قدره سحرية على انه يتحول لأي شخص.. بشرط انه يصلح حذاؤه بماكينة خياطة قديمة خاصه بوالده. وانه يرتدي الحذاء ده. ساعتها بس بيتحول للشخص ده!
فى البداية بيشعر بالرعب.. ثم بيبدأ يستكشف السلاح السري الغريب اللى وقع تحت ايده.. ثم بيبدأ فى تجربة السحر الجديد فى مشاهد غاية فى الكوميديا، ثم بيبدأ يستعمل الموضوع ده علشان يخلى حياته افضل، وحياه اللى حواليه، وينشر السلام والخير بقدر ما يستطيع.
البطولة توزعت بين الين باركين، ميثودمان، داسكا بولانكو واخيرا داستن هوفمان كضيف شرف مع مشاركة متميزة من ستيف بوشيمي باداء متميز، وان كان مساحة ساندلر ودوره لم تكن بالقوة او الكثرة اللى كنا نتوقعها بالنسبة لبطل الفيلم.
الموسيقي التصويرية لم تكن بالقوة اللى نتوقعها لكن المؤثرات الخاصة كانت متميزة وخصوصا الخدع اللى ليها علاقة بتغيير الشخصيات بعد ارتداء الاحذية. تم تنفيذ المشاهد دي بذكاء وسهولة فى نفس الوقت.
الفيلم بينتمي لفئة الكوميديا المختلطة بالرسالة الانسانية، لكن الملل اصابنا فى منتصف الفيلم قليلاً، على الرغم من قوة القصة وتماسك السيناريو، لكن السيناريو وتدفق الاحداث لم يكن بالقوة اللى كنا نتوقعها.
بين الكوميديا والرسالة الانسانية بيتأرجح فيلم ادم ساندلر الجديد.. تقييمنا له هايكون من متوسط الى جيد. ونرشحه للمشاهدة للمشاهدين طويلي البال ومن محبى ساندلر بشكل عام.
