The Commuter: مؤامرة وجريمة على متن قطار

الروتين والحياة اليومية المملة من أكتر الحاجات اللي ممكن تخلي حياة الأنسان تعيسة وشاقة بدون ما يشعر. لكن البعض بيتعود على حياته الروتينية لدرجة تخليه يكره يغيرها، والبعض زي ليام نيسون في فيلمنا، بيتم دفعه دفعا لتغيير عاداته اليومية والا هايكون متورط في جريمة ضخمة! تعالوا نتعرف أكتر على The Commuter

القصة

The Commuter بيحكي عن قصة رجل بيعيش حياة روتينية بتخليه يركب يوميا قطار متوجه من مكان لأخر. وفي أحد الأيام بيقابل أمرأة مجهولة بتتلاعب بعقله وبتشقلب روتين  حياته، بشكل بيخليه يتجول في القطار علشان يكشف لغز كبير قبل وصول القطار لأخر محطة، وإلا هايتم اتهامه بجريمة خطيرة وبشكل يقلب حياته كلها رأسا على عقب!

فريق العمل

الفيلم من اخراج جومي كوليت سيرا وتأليف بايرون ويلينجر وبطولة ليام نيسون و فيرا فارميجا و باتريك ويلسون و جوناثان بانك و سام نيل و إليزابيث وكجوفيرن

الأداء التمثيلي

ليام نيسون بيثبت لنا في كل دور بيقوم بيه قدرته على تقديم أشكال مختلفة تماما من الأنماط التمثيلية، وعدم اعتماده فقط على امكانياته الجسدية علشان يقدم الأفلام اللي بيقوم ببطولتها، وده يحسب له في النهاية كنقطة قوة بتخليه زي الجوكر يقوم بأي دور يسند له.

السيناريو والحوار والأخراج

سيناريو الفيلم سريع ومتلاحق خاصة في الربع الثاني من الأحداث وحتى النهاية، وهايحتاج من المشاهدين تركيز كبير خاصة في جمل الحوار المتلاحقة واللي بتفسر كتير من أحداث الفيلم، أما الأخراج فا قدر يجمع كل العناصر دي مع بعضها علشان يقدم لنا في النهاية عمل فني مترابط وقوي.

الديكورات والموسيقى والأزياء

الفيلم اعتمد على الديكورات الداخلية في كتير من احداثه، وقدر يقدم ديكورات القطر بشكل مميز ومختلف، كمان موسيقى الفيلم كانت قوية وحماسية وكانت عارفه تنسجم مع الأحداث بشكل جيد، أيضا زوايا التصوير واختيارها مع المؤثرات الخاصة ساعدت على انتاج مشاهد قوية وممتعة في سياق الأحداث.

الخلاصة

The Commuter فيلم قوي وأحداثه سريعة وهايعجب كل محبي أفلام الغموض والأثارة.

علشان تبقى عارف:

تقييم الفيلم على IMDB 6.5 من 10