The Conjuring 2 : الأشباح الصاخبة تضرب من جديد
محبي أفلام الرعب مش هاينسوا الرجفة اللى صاحبتهم أثناء مشاهدة الجزء الأول من السلسلة دي.. صناع الفيلم نفسهم مش هاينسوا الملايين اللى نزلت عليهم من السماء نتيجة نجاح الجزء الأول، الأمر اللى دفعهم لإنتاج الجزء التاني، واللى جه فى مجمله أكثر رعباً وتشويقاً من الجزء الأول، ومع حملة الدعاية المكثفة اللى صاحبت إصدار الفيلم نقدر نقول أننا أمام فيلم رعب قوي ومختلف.
من إخراج جيمس وان وبطولة فيرا فارميجا و باتريك ويلسون و فرانسيس أوكونور و خافيير بوتيت و سيمون ماكبرني و ماريا دويل كينيدي بنشوف قصة عائلة بتسكن منزل، ومع مرور الوقت بتبدأ أمور غريبة وشريرة فى الحدوث، بداية من العفش اللى بيطير فى السماء والصليب اللى بينقلب على السقف، وأمور كتيرة بتجبر الأسرة على إستدعاء خبراء فى علوم ما وراء الطبيعة.
مع إنتقال الخبراء لمعاينة المنزل بيحصل جدل وإختلاف بينهم، مابين رأي مؤيد لفكرة إن اللى بيحصل ده مس شيطاني حقيقي طال بنت من البنات الموجودة فى البيت، والرأي التاني بيقول إن كل اللى بيحصل ده عباره عن تمثيل وخداع، ولأننا مش عاوزين نحرق أحداث الفيلم هانسيبكم تعرفوا بنفسكم أي رأي فيهم هو الصح.
المؤثرات الخاصة فى الفيلم لعبت دور مهم جدا، بداية من تحريك الأشياء ومؤثرات الأصوات وحتي الديكورات وخاصة ديكور المنزل المسكون وإنتقال الكاميرا بين الغرف والطوابق، كلها أمور ساعدت على بث الرعب فى نفوسنا كمشاهدين، ومع تكنيكات الإضاءة والظهور المفاجىء للأشباح نقدر نقول إن الفيلم يعتبر اختبار حقيقي لمحبى أفلام الرعب ولقدرتهم على التحمل.
الأداء التمثيلي للأبطال كان متميز ومختلف جدا خاصة ماديسون وولف فى دور جانيت واللى قدرت تنقل لنا انفعالات ومشاعر الشخصية اللى بتقدمها بأفضل ما يكون، باقى الأدوار كانت قوية ومؤثرة وحسينا إن كل فنان كان فى مكانه بالظبط ومش متخيلين أي شخص تاني ممكن يقوم بالدور غيره.
أهم حاجه لازم تاخدوا بالكم منها هى عدم مغادرة السينما بعد نهاية الفيلم مباشرة، لأنكم هاتشوفوا مجموعة مشاهد ومعلومات فى غاية الأهمية، مش عاوزين نحرقها عليكم بس فى رأينا إن أخر دقائق فى الفيلم مع نزل التترات كانت مرعبة أكتر من الفيلم نفسه! ومش هانقول أكتر من كده!
لازم نأكد على أن الفيلم للكبار فقط، وأحترمنا جداً موقف موظفين الحجز فى سينما مول أمريكانا بلازا فى 6 أكتوبر لما رفضوا محاولات كتيرة لأطفال صغيرة أقل من السن المسموح له بمشاهدة الفيلم، وده تصرف مكانش بيحصل فى سينمات كتير كانت بتهتم فقط ببيع أكبر كمية من التذاكر لأي فئة عمريه.
سلسلة أفلام The conjuring واحدة من أقوي سلاسل أفلام الرعب فى العالم، وواحده من السلاسل اللى بيحبها ويتابعها محبى أفلام الرعب وأصحاب القلوب الميته، لو كنت منهم ننصحك تشوف الفيلم فى أقرب سينما ليك فوراً، أما لو كنت بتخاف جداً من الافلام دي ننصحك بمشاهدة Finding Dory.. ده فيلم ظريف ولطيف ويناسب أصحاب القلوب المرهفة : )
