The Convent : مايستحقش ثمن التذكرة!
ساعات كتيره يبقى معاك فيلم قوي بقصة مؤثرة. لكن شوية عوامل بسيطة – لكن مهمة في نفس الوقت- تؤدي بالنهاية لفشل الفيلم!
The Convent بيحكي عن فترة مظلمة في تاريخ البشرية، لما كانت محاكم التفتيش بتحكم على ناس كتير بالموت من خلال الأحداث اللي أصبح اسمها بعد كده محاكمة الساحرات. في الاطار ده بيصدر حكم بالاعدام على واحدة من السيدات، لكنها بتقدر تهرب من مصيرها المظلم. ومن هنا بتبدأ الأحداث في التطور.
على الرغم من قوة القصة اللي كتبها وأخرجها بول هايت الا ان تقديم القصة دي على الشاشة كان ضعيف ومحتاج مجهود أكبر علشان يكون أقوى. الأداء التمثيلي من روزي داي و كلير هيجنز وباقي ابطال الفيلم كان ضعيف ومضطرب وغير منطقي في بعض المشاهد.
أسوأ ما في الفيلم كان الخدع السينمائية اللي حسينا انها كانت مفتعلة، ومحاولة اختلاق أي مشهد مرعب علشان المشاهدين يحسوا أنهم امام فيلم رعب. محاولات كانت كلها فاشلة من وجهة نظرنا وما حسيناش بالرعب
لكن الفيلم نجح من خلال الديكورات والأزياء انه يقدم لنا واحدة من الحقبات المظلمة في تاريخ أوروبا. لكن هل بنتوقع نجاح فيلم رعب بسبب الأزياء والديكورات؟!
The Convent نجح في خلق جو مرعب ومظلم، لكن فشل في تقديم أي حاجه لها علاقة بالرعب
