The Courier : الكليشيهات لوحدها مش كفايه!

ساعات صناع الفيلم بيكون قدامهم حبكة كويسة. قصة معقولة. فريق تمثيلي مميز. لكن رغبتهم في عمل فيلم كله كليشيهات محفوظه بتوصلهم في النهاية للفشل. هو ده بالظبط اللي حصل مع The Courier

The Courier بيحكي عن واحد من زعماء العصابات (جاري أولدمان) اللي بيتم التحفظ عليه على ذمة قضية كبيرة. الشاهد الوحيد في القضية دي (أميت شاه) يقدر يضيع مستقبل الزعيم بشهادته. ومن هنا بيحاول الزعيم (إيزكيل مانينجس) أنه يقتله. لكن تدخل شخصية غامضة (أولجا كوريلينكو) بيغير قوانين اللعبة كلها.

زي ما احنا شايفين The Courier عنده قصة جميلة يشتغل عليها. ومع كاست زي جاري أولدمان و أولجا كوريلينكو المشهورة بدورها في فيلم جيمس بوند Quantum of Solace كان ايه ناقص علشان نشوف فيلم ممتع؟

كان ناقص أن المخرج والمؤلف زاكاري أدلر مايستسهلش في تقديم كل كليشيهات السينما في الفيلم. وبنقصد هنا كليشيهات مشاهد الاشتباك والمعارك. والطريقة اللي بيتم استعراض ماضي البطلة من خلاله. واللي نقدر نستنتج من خلاله كل لحظة من بداية الفيلم لنهايته!

حاجه تانيه تخلي الفيلم مش عاجبنا. هو التوظيف العجيب لفريق العمل. يعني بنشوف جاري اولدمان في دور أقل ما يقال عنه أنه ضعيف جدا. هل يعقل أن الفائز بجايزة الأوسكار يرضى على نفسه بدور بحجم صغير وامكانيات أداء قليلة كده!

في النهاية. نقدر نعتبر The Courier فيلم أتوفرت له كل عوامل النجاح لكن صناعه أختاروا يبوظوا  (الطبخة) لما ماحطوش عليها شوية ملح!