The Curse of La Llorona : فيلم بدون أي ابتكار
مش معني أننا عملنا فيلم مرعب فيه عناصر معينة ونجح الفيلم وكسر الدنيا. أننا نقدر نعيد نفس التجربة بنفس العناصر مئات المرات ونحقق نفس نسبة النجاح! هو ده الدرس اللي فشل معظم صناع أفلام الرعب في تعلمه بعد نجاح أفلام زي The Omenأو The Exorcist وبيحاولوا يكرروا نفس التيمات والعناصر بدون أي محاولة لعمل ابتكار او تغيير.
فيلم The Curse of La Llorona بيحكي عن أم بتعاني مع أطفالها من ترصد كيان شرير بهم. ومش بيكون أمامهم غير الاستعانة بكاهن علشان يمارس طقوسه الكهنوتيه ضد الكيان اللي بينتمي لعالم الشيطان.
مش محتاجين خبير في عوالم الرعب علشان نقرا العوامل الأساسية المعتمد عليها الفيلم.. الرعب القائم على الخضه من الظهور المفاجئ لكيان ما في جوانب كادر الشاشة. والرعب القائم على وجود طفل بيتعرض للأستحواذ. والإنقاذ اللي بيكون له علاقه برجل دين.
ولو تغاضينا عن القصة المكررة هانلاقي أن تنفيذ الحبكة المكررة دي نفسه كان ضعيف. سواء على مستوى الإخراج اللي قام به مايكل تشافيز واللي ظهر فيه ضعف التنفيذ والخدع السينمائية. حتى أننا مش بنشوف مشاهد واضحة للكيان الشيطاني لأن تنفيذه أعتمد على الخدع المنفذة بالكمبيوتر بالمقام الأول.
أما على صعيد الأداء التمثيلي بنلاحظ ضعف عام في معظم الأدوار يمكن ماعدا دور الطفلة جين لين كينشن اللي أدت دورها بشكل جيد ومقنع جدا لنا كمشاهدين.
The Curse of La Llorona فيلم هايعجب محبي أفلام الرعب النمطية التقليدية. لا تتوقعوا أي حاجه أبعد من كده
