The Dark Tower: الحد الفاصل بين الموت والحياة
الأفلام المقتبسة عن روايات شهيرة بيكون لها رونق خاص. بالتأكيد بسبب أنها بتكون مقتبسة من أعمال مكتوبة بتركيز أكبر من السيناريوهات الموجهة للسينما في المقام الأول، على الرغم من انتظار المشاهدين لما هو أفضل من تصوراتهم وخيالهم الخاص بالرواية. وده بيكون صعب.
القصة
الفيلم بيحكي عن طفل صغير بيشوف في أحلامه رجل حامل للسلاح بيحاول يتصدى لرجل أخر بيحاول يدمر الكون بالشكل اللي احنا عارفينه. ومع تحول الأحلام لواقع حقيقي على الأرض، بنجد نفسنا في مغامرة غريبة للحفاظ على برج بيمثل الحد الفاصل بين الموت والحياة بالنسبة لكوكب الأرض كله.
فريق العمل
الفيلم من اخراج نيكلج أرسيل عن رواية ستيفن كينج واللي أعدها للسينما أندريه توماس جينسين ومن بطولة ماثيو ماكونهي و إدريس إلبا و كاثرين وينيك و كلاوديا كيم و جاكي إيرل هالي
الأداء التمثيلي
الأداء التمثيلي لكل العاملين في الفيلم كان أكتر من رائع، وجعلنا نشعر اننا أمام مباراة تمثيلية عظيمة خاصة بين ماثيو ماكونهي وادريس البا واللي قدروا يقدموا دويتو سينمائي قوي ومختلف.
السيناريو والحوار والأخراج
سيناريو الفيلم كان متميز وقوي، لكنه كان بيتسم بالبطء في البداية، الأمر اللي جعلنا نشعر بالملل خاصة في النصف الأول من الأحداث. لكن مع الوقت واستمرار الأحداث بيتحول الملل لترقب وانتظار لطريقة سير الأحداث وتطورها.
لكن لازم نقول أن الناس اللي مش بتحب أفلام الفانتازيا مش هايعجبهم الفيلم على الإطلاق. علشان كده تنوعت الأراء النقدية عن الفيلم مابين منتهى الأعجاب أو منتهى الكراهية!
الديكورات والموسيقى والأزياء
ديكورات الفيلم كانت متميزة الى اقصى درجة، كمان المؤثرات الخاصة لعبت دور مهم في قوة الأحداث وتقريب وجهة نظر الفيلم من المشاهدين. أيضا مشاهد اطلاق النار بالحركة البطيئة وغيرها من تكنيكات التصوير كان لها أكبر أثر في نجاح الفيلم.
كمان الأزياء كانت محكمة وقدرت ترجعنا لعصور الكاوبوي في المشاهد اللي كان فيها صراع راجع للزمن ده.
الخلاصة
The Dark Tower فيلم لمحبي الخيال العلمي والفانتازيا، علشان كده لازم يكون عندكم قبول للدخول في عالم الفيلم وتصديق أحداثه قبل أي شيء.
علشان تبقى عارف:
تقييم الفيلم على IMDB 6 من 10 وقام بالتصويت على الفيلم حوالي 6000 مستخدم للموقع.
