The Dead Room : فيلم جديد عن الأشباح المزعجة
يبدو إن الوقت فات علشان نتوقع فيلم رعب جديد مبني على تيمات حديثة، أو قدرة ورغبة حقيقية من صناعه على تقديم جديد فى المجال اللى اصبح محفوظ من كثرة اللى بنشوفه على شاشات هوليود من افلام رعب كلها تقريباً مقتبسة من نفس التيمة… للأسف فيلم اليوم بيعتمد على نفس الأمور بدون أي محاولة للتجديد أو إضافة أي عنصر تشويق جديد.
من تأليف و إخراج جايسون ستاتر وبطولة جيد بروفى و جيفري توماس ولورا بيترسن بنشوف قصة مجموعة من المتخصصين بتحاول تكتشف الحقيقة وراء أحد البيوت المسكونة، واللى اهله بيتركوه وبيهربوا منه وهم خائفين… التريلر الدعائى للفيلم بيقول إن الفيلم مقتبس عن قصة حقيقية، لكن مش بيقول قدر الإقتباس ده.. لإنه فى رأينا لا يتعدي أكتر من 1% من قيمة الفيلم كله، ودي الحيلة الجديدة اللى بيتبعها صناع أفلام الرعب دلوقت، وهى إدعاء إن أفلامهم مقتبسة عن قصص حقيقية علشان يجذبوا مشاهدين أكتر.
الأداء التمثيلي للأبطال كان فى أضعف حالاته، وطوال الوقت كان عندنا إحساس إنهم بيمثلوا وهم عارفين ايه اللى هايحصل.. بالتالى ما كناش بنشوف انطباعات رعب حقيقية على الوجوه، أو تصرفات الأبطال، واللى على الرغم من قلتهم أثبت المخرج جايسون ستاتر عدم قدرته على السيطرة عليهم أو التحكم السليم فى انفعالاتهم.
الموسيقي التصويرية كانت قوية الى حد ما، على العكس من المؤثرات الخاصة اللى كانت ضعيفة وغير مقنعة بالمرة، وحسينا فيها بتدخل الجرافيك أكتر من مره، ومستوي الفيلم بشكل عام نقدر نقول إنه أقل من المقبول.
الحاجه الوحيده اللى تخليك تدخل The Dead room هى إنك تكون من عشاق أفلام الرعب والباحثين عنها بأي حال من الأحوال، مهما كانت جودتها أو إهتمامها بالتفاصيل.. فى الحالة دي ممكن يعجبك The Dead Room.
